ایریڈ ایگریکلچر یونیورسٹی راولپنڈی میں دوسرا بین الاقوامی پریسژن ایگریکلچر کانفرنس 2025 کا آغاز
راولپنڈی: پیر مہر علی شاہ ایریڈ ایگریکلچر یونیورسٹی راولپنڈی (PMAS-AAUR)** میں تین روزہ دوسرا بین الاقوامی پریسژن ایگریکلچر کانفرنس 2025 کا آغاز ہو گیا۔ کانفرنس کا انعقاد سینٹر فار پریسژن ایگریکلچر (C4PA) کے زیراہتمام کیا گیا جس کا مقصد تحقیق کاروں، سائنس دانوں اور صنعتی ماہرین کو ایک پلیٹ فارم پر اکٹھا کرنا ہے تاکہ جدید ڈیجیٹل ٹیکنالوجی کے ذریعے زرعی منافع میں اضافہ اور ماحولیاتی اثرات میں کمی لائی جا سکے۔
کانفرنس کا مرکزی موضوع "ڈیجیٹل جدت کے ذریعے زراعت میں تبدیلی” رکھا گیا ہے۔ امریکہ، کینیڈا، چین اور دیگر ممالک سے درجنوں بین الاقوامی ماہرین نے آن لائن اور بالمشافہ شرکت کی۔ کانفرنس میں دو سو سے زائد محققین، طلباء، اساتذہ اور نجی و سرکاری اداروں کے نمائندے شریک ہوئے۔
افتتاحی اجلاس سے خطاب کرتے ہوئے مہمانِ خصوصی پروفیسر ڈاکٹر اقرار احمد خان (ستارہ امتیاز، ہلال امتیاز) چیئرمین پنجاب ہائر ایجوکیشن کمیشن (PHEC) نے کہا کہ ملک میں ڈیجیٹل اور پریسژن ایگریکلچر کے فروغ کے لیے مربوط حکمتِ عملی وقت کی اہم ضرورت ہے، خصوصاً موسمیاتی تبدیلیوں کے تناظر میں۔ انہوں نے کہا کہ اس طرح کی کانفرنسیں نہ صرف اساتذہ بلکہ طلباء کے لیے بھی علم اور تجربات کے تبادلے کا بہترین موقع فراہم کرتی ہیں۔
وائس چانسلر پروفیسر ڈاکٹر قمرالزمان نے اپنے خطاب میں کہا کہ پاکستان میں پریسژن ایگریکلچر کے شعبے میں بے پناہ صلاحیت موجود ہے جو زرعی پیداوار میں اضافے، پیداوار کے فرق کو کم کرنے اور غذائی تحفظ کے حصول میں مددگار ثابت ہو سکتی ہے۔ انہوں نے کہا کہ موسمیاتی تبدیلی کے اثرات سے نمٹنے کے لیے کلائمیٹ اسمارٹ ٹیکنالوجیز کی ترقی وقت کی ضرورت ہے۔
وائس چانسلر نے زرعی نمائش کے موقع پر گفتگو کرتے ہوئے کہا کہ "میں تمام محققین، طلباء اور کسانوں کو دعوت دیتا ہوں کہ وہ جدید زرعی مشینری اور آلات کی اس نمائش سے بھرپور فائدہ اٹھائیں۔ زراعت کا منظرنامہ تبدیل ہو چکا ہے، اب روایتی کاشتکاری کے طریقوں میں تبدیلی ناگزیر ہے۔ ہمارا ہدف صرف حال نہیں بلکہ مستقبل کی منصوبہ بندی ہے اور جدید زراعت ہی ہمارا مستقبل ہے۔”
کانفرنس سے ڈاکٹر عتیزاز اے. فاروق (یونیورسٹی آف پرنس ایڈورڈ آئی لینڈ، کینیڈا)، ڈاکٹر ہائمانوٹے کے. بایابل (یونیورسٹی آف فلوریڈا، امریکہ) اور ڈاکٹر کریگ میک ایچرن (ڈلہاؤزی یونیورسٹی، کینیڈا) نے بھی کلیدی خطابات کیے۔ انہوں نے کہا کہ جدید زرعی ٹیکنالوجی اور ڈیجیٹل زراعت کے فروغ سے نہ صرف خود کفالت حاصل کی جا سکتی ہے بلکہ زرعی مصنوعات کی برآمدات کا خواب بھی شرمندۂ تعبیر ہو سکتا ہے۔
کانفرنس کی نمایاں سرگرمیوں میں فوڈ فیسٹ 2025 شامل تھا جس میں انسٹیٹیوٹ آف فوڈ اینڈ نیوٹریشنل سائنسز کے 80 سے زائد طلباء نے گھریلو تیار کردہ کھانوں کے اسٹالز لگائے اور متوازن غذا کی اہمیت کو اجاگر کیا۔ اس کے علاوہ آئی ٹی نمائش، پرندوں کی نمائش، آرٹ اینڈ کرافٹ شو اور پوسٹر مقابلہ بھی کانفرنس کا حصہ تھے۔
تقریب کے اختتام پر معزز مہمانوں، مقررین اور شرکاء میں شیلڈز اور سووینئرز تقسیم کیے گئے۔
