چیرمین وزیراعظم یوتھ پروگرام رانا مشہود احمد خان نے دولتِ مشترکہ اور برطانوی ایسپورٹس فیڈریشن کے وفد کے اعزاز میں خصوصی عشائیہ دیا۔ اس موقع پر ملکی اور غیر ملکی اہم شخصیات نے شرکت کی اور نوجوانوں کی ترقی، جدت اور ایسپورٹس کے شعبہ میں باہمی تعاون کے مواقع پر بات چیت کی۔
اس عشائیے میں سیکرٹری بین الصوبائی رابطہ، سیکرٹری تعلیم، قائم مقام چیئرمین اعلیٰ تعلیمی کمیشن اور رکن قومی اسمبلی و فوکل پرسن وزیر اعظم یوتھ پروگرام سیدہ آمنہ بتول سمیت دیگر اہم شخصیات بھی موجود تھیں۔ شرکاء نے نوجوانوں کے مستقبل کو بہتر بنانے اور عالمی معیار کے مطابق ایسپورٹس پروگرامز متعارف کرنے کے حوالے سے مشترکہ اقدامات پر اتفاق کیا۔ اس موقع پر یوتھ ڈویلپمنٹ اور انوویشن کے نئے مواقع تلاش کرنے پر بھی زور دیا گیا۔
