وزیراعظم محمد شہباز شریف سے چیئرمین پاکستان پیپلز پارٹی بلاول بھٹو زرداری کی ملاقات اہم سیاسی شخصیات اور وفاقی وزراء کی موجودگی میں ہوئی، جس میں مختلف امور پر بات چیت کی گئی۔ اس موقع پر بلاول بھٹو زرداری نے وزیراعظم سے ان کے کزن میاں شاہد شفیع کے انتقال پر تعزیت کی اور دعا کی کہ مرحوم کے درجات بلند ہوں نیز اہل خانہ کو صبر عطا ہو۔
بلاول بھٹو زرداری کے ہمراہ سینیٹر شیری رحمان اور رکن قومی اسمبلی آصفہ بھٹو زرداری بھی موجود تھیں۔ ملاقات کے دوران بلاول بھٹو زرداری نے مرحوم میاں شاہد شفیع کے بڑے بھائی جاوید شفیع سے ٹیلی فون پر بھی رابطہ کیا اور ان سے تعزیت اور ہمدردی کا اظہار کیا۔
ملاقات میں نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ، وفاقی وزیر برائے پبلک افیئرز یونٹ رانا مبشر اقبال، وزیراعظم کے مشیر برائے سیاسی امور رانا ثناء اللہ، وزیر مملکت برائے غذائی تحفظ و تحقیق ملک رشید احمد صدیقی، وزیر مملکت برائے پاور ڈویژن عبدالرحمان کانجو، رکن قومی اسمبلی سائرہ افضل تارڑ، اسپیکر پنجاب اسمبلی ملک احمد خان اور معاون خصوصی طلحہ برکی بھی شریک ہوئے۔
اس ملاقات کے دوران اہم سیاسی و قومی امور پر مشاورت کی گئی جبکہ وزیراعظم سے اظہار تعزیت اور ہمدردی کے جذبات کا بھی اظہار کیا گیا۔
