پاکستان انسٹیٹیوٹ آف ڈیویلپمنٹ اکنامکس (PIDE) نے اپنے آئندہ تین سالہ تحقیقی منصوبے کا جائزہ لینے کے لیے ایک اہم اجلاس منعقد کیا۔ اس اجلاس کا مقصد ملک کو درپیش سنگین معاشی، سماجی اور ماحولیاتی مسائل کے حل کے لیے تحقیقاتی ایجنڈے کو مزید مؤثر اور مستقبل بین بنانا تھا۔
اجلاس کی صدارت وائس چانسلر ڈاکٹر ندیم جاوید نے کی، جس میں ریسرچ سینٹرز کے ڈائریکٹرز، ان کی ٹیموں اور ڈینز نے شرکت کی۔ اجلاس کے دوران ہر ڈائریکٹر نے اپنی تحقیقی ترجیحات اور آئندہ کے منصوبہ جات پیش کیے، جن کا فوکس پاکستان کو درپیش اہم چیلنجز پر تھا۔
ڈاکٹر ندیم جاوید نے کہا کہ PIDE ملک کی پالیسی سازی کے لیے جدید تحقیق، نئے خیالات اور عملی حل پر بھرپور یقین رکھتا ہے۔ ان کا کہنا تھا کہ ادارہ شواہد پر مبنی اور نتیجہ خیز تحقیق کے ذریعے پاکستان کی پائیدار ترقی میں اپنا فعال کردار ادا کرتا رہے گا۔ اجلاس میں تحقیقی کام کو بہتر بنانے اور ملکی ترقی میں تحقیق کے کردار کو مزید مضبوط بنانے کے لیے مختلف تجاویز بھی زیرِ غور آئیں۔
