پاکستان کے ٹیکسٹائل سیکٹر کے لیے امریکی مارکیٹ میں اپنی مصنوعات پہنچانے کا ایک غیر معمولی موقع سامنے آیا ہے، جس کی وجہ بھارت پر بھاری امریکی ٹیرف کا نفاذ ہے۔ فیڈریشن آف پاکستان چیمبرز آف کامرس اینڈ انڈسٹری کے صدر عاطف اکرام شیخ نے اپنے بیان میں کہا ہے کہ بھارت کی سولہ ارب ڈالر کی ٹیکسٹائل برآمدات اس فیصلے کے بعد متاثر ہوں گی اور پاکستان کے لیے امریکی منڈی میں جگہ بنانے کا یہی بہترین وقت ہے۔
عاطف اکرام شیخ کے مطابق پاکستان اس موقع سے اسی صورت فائدہ اٹھا سکتا ہے جب حکومت اور تمام متعلقہ ادارے مل کر مربوط پالیسی کے تحت کام کریں۔ انہوں نے کہا کہ عالمی مارکیٹ میں پاکستان کو ایک دہائی میں شاید ایک بار ایسی سہولت میسر آتی ہے، اس لیے فوری اور جرات مندانہ اقدامات کی ضرورت ہے۔
انہوں نے مزید کہا کہ اگر اب کوئی فیصلہ کن قدم نہ اٹھایا گیا تو ملک یہ قیمتی موقع گنوا سکتا ہے۔ ان کا کہنا تھا کہ ای ایف ایس تک رسائی فوری بحال کی جائے اور کاروباری لاگت میں نمایاں کمی لائی جائے۔ اگرچہ حکومت کی نئی صنعتی پالیسی ایک مثبت پیش رفت ہے، مگر انڈسٹری کے لیے توانائی قیمتوں میں کمی لازمی ہے۔
عاطف اکرام شیخ نے تجویز دی کہ حکومت کو چاہیے کہ طویل المدتی پالیسیاں بنائے تاکہ پاکستان کا ٹیکسٹائل سیکٹر عالمی منڈی میں زیادہ بڑا حصہ حاصل کر سکے۔ انہوں نے یہ بھی کہا کہ ملک کے معاشی مسائل کا پائیدار حل برآمدات میں خاطر خواہ اضافے سے ہی ممکن ہے اور موجودہ حالات پاکستانی صنعت کے لیے ایک سنہری موقع ہیں۔
