پاکستان اور قطر کے درمیان ماحولیاتی تحفظ اور معاشی شراکت داری کو فروغ دینے پر اتفاق
اسلام آباد میں وفاقی وزیر برائے موسمیاتی تبدیلی ڈاکٹر مصدق ملک اور قطر کے سفیر علی مبارک علی عیسیٰ ال خاتر کے درمیان اہم ملاقات ہوئی جس میں دونوں ممالک کے مابین ماحولیاتی تعاون، سرمایہ کاری کے مواقع اور بین الاقوامی فورمز پر مشترکہ حکمت عملی کے امور زیر بحث آئے۔
ملاقات کے دوران دونوں رہنماؤں نے پلاسٹک آلودگی کے خاتمے کے لیے عالمی معاہدے پر ہونے والی پیش رفت اور جینیوا میں آئندہ ہونے والے مذاکرات پر گفتگو کی۔ ڈاکٹر مصدق ملک نے اس موقع پر زور دیا کہ ترقی پذیر ممالک خصوصاً پاکستان کے لیے ماحولیاتی معاہدوں میں مساوی مواقع، آسان رسائی اور پائیداری کو یقینی بنایا جانا چاہیے۔ ان کا کہنا تھا کہ عالمی معاہدوں میں مقامی معاشرتی اور معاشی ضروریات کو مدنظر رکھنا حکومتوں کی ذمہ داری ہے تاکہ عوام کے حقوق اور روزگار کا تحفظ ہو سکے۔
وفاقی وزیر نے قطر کے سفیر کو وزیر اعظم کے وژن کے تحت بنائی جانے والی گرین اسٹارٹ اپس انیشی ایٹو سے بھی آگاہ کیا۔ اس منصوبے کا مقصد نوجوان کاروباریوں کو ماحول دوست منصوبوں کے آغاز میں مدد فراہم کرنا، انہیں بین الاقوامی سرمایہ کاروں سے جوڑنا اور ملک کی معیشت میں نوجوانوں کے فعال کردار کو فروغ دینا ہے۔ اس کاوش کو عالمی سطح تک لے جانے اور مختلف بین الاقوامی اداروں اور حکومتوں سے مشاورت کا عمل جاری ہے۔
اس موقع پر قطر کے سفیر نے فیفا ورلڈ کپ 2022 کے دوران پاکستان کی سیکیورٹی معاونت کو سراہا اور کہا کہ پاکستانی قوم قطر کے دلوں میں خصوصی مقام رکھتی ہے۔ انہوں نے موسمیاتی تبدیلی، تجارت اور سرمایہ کاری سمیت مختلف شعبوں میں تعاون کو بڑھانے میں گہری دلچسپی کا اظہار کیا۔
دونوں ممالک نے باہمی دلچسپی والے شعبوں خصوصاً ماحولیات، معیشت اور عوامی روابط میں تعلقات کو مزید مضبوط بنانے کے عزم کا اعادہ کیا۔ اس ملاقات میں سیکریٹری موسمیاتی تبدیلی عائشہ حمیرا اور وزارت خارجہ کے اسپیشل سیکریٹری برائے اقوام متحدہ نبیل منیر بھی شریک تھے۔
