وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ نے کہا ہے کہ حالیہ ہائبرڈ جنگ میں پاکستان کی کامیابی نے ملک کا سائبر ڈیفنس مضبوط بنا دیا ہے اور اس شعبے میں اعتماد میں اضافہ کیا ہے۔ انہوں نے کہا کہ یہ لڑائی روایتی نہیں بلکہ سائبر وار اور مسلح تصادم کا ملاپ تھی، جس میں پاکستان نے اپنی ڈیجیٹل انفراسٹرکچر کا کامیابی سے دفاع کیا۔
شزا فاطمہ نے ‘نیکسٹ جن سائبر ریزیلینس ورکشاپ اور ٹیلی کوم سائبر سیکیورٹی ایوارڈ 2024-25’ سے خطاب کرتے ہوئے کہا کہ سائبر سیکیورٹی کے قوانین وقت کی اہم ضرورت ہیں تاکہ ممکنہ خطرات کا مقابلہ مؤثر انداز میں کیا جا سکے۔ انہوں نے نوجوانوں کو آن لائن سیکیورٹی کے بارے میں زیادہ سے زیادہ شعور حاصل کرنے کی تلقین کی اور اعلان کیا کہ خواتین اور بچوں کے لیے سائبر اسپیس کو مزید محفوظ بنایا جائے گا۔ ان کا کہنا تھا کہ جیسے جیسے ٹیکنالوجی آگے بڑھ رہی ہے، سائبر سیکیورٹی کی ضرورت میں بھی اضافہ ہوتا جا رہا ہے۔
وفاقی وزیر نے حکومت کے "ڈیجیٹل نیشن پاکستان” وژن اور بہتر انٹرنیٹ کنیکٹیویٹی کی کوششوں کو اجاگر کیا۔ انہوں نے بتایا کہ جلد ہی دو نئی سب میرین کیبلز نیٹ ورک کپیسٹی بڑھائیں گی۔ اس کے ساتھ ساتھ قومی فائبرائزیشن پالیسی پر بھی کام جاری ہے، جبکہ ٹیلی کام ایکٹ میں ترامیم کے ذریعے رائٹ آف وے کے مسائل حل کیے جائیں گے۔ شزا فاطمہ نے اس بات کی بھی نشاندہی کی کہ پاکستان کا ٹیلی کام اسپیکٹرم محدود ہے، جو ٹیکنالوجی کی تیز تر توسیع میں رکاوٹ ہے۔
پاکستان ٹیلی کمیونیکیشن اتھارٹی کے چیئرمین، ریٹائرڈ میجر جنرل حافظ الرحمن نے تقریب میں گفتگو کرتے ہوئے عوام پر زور دیا کہ وہ جدید ٹیکنالوجی پر اعتماد کریں اور اس کو اپنائیں۔ ان کا کہنا تھا کہ پاکستان ابھی 5G کے لیے تیاری کر رہا ہے جبکہ دنیا کے کئی ممالک 6G پر کام کر رہے ہیں۔ انہوں نے مصنوعی ذہانت کے غلط استعمال، خاص طور پر جعلی آڈیو اور ویڈیو بنانے کے خطرات کے بارے میں بھی خبردار کیا۔ پی ٹی اے چیئرمین نے کہا کہ پاکستان سیٹلائٹ اور ریڈیو بیسڈ سروسز کے لیے قواعد و ضوابط آخری مراحل میں ہیں اور متعلقہ کمپنیوں کی رجسٹریشن کے بعد کم مدار والے سیٹلائٹ کے ذریعے انٹرنیٹ سروس فراہم کی جائے گی۔
