سیکرٹری بین الصوبائی رابطہ محی الدین احمد وانی نے عبوری صدر کے طور پر پاکستان ہاکی فیڈریشن کی ذمہ داریاں سنبھالنے کے بعد کہا ہے کہ وہ قومی کھیل کی بحالی اور مضبوطی کے لیے بھرپور کوشش کریں گے۔ انہوں نے متعلقہ فریقین کو یقین دلایا کہ تنظیم کو مستحکم کرنا اور اعتماد کی بازیابی ان کی اولین ترجیحات ہوں گی۔محی الدین احمد وانی نے بتایا کہ ٹیم مینجمنٹ کی ازسرنو تشکیل اور انتظامی ڈھانچے کی اصلاح فوری اقدامات میں شامل ہیں تاکہ کھلاڑیوں کو بہترین ماحول فراہم کیا جا سکے۔ قلیل مدتی طور پر فوری مسائل کو حل کرنے پر توجہ دی جائے گی جبکہ درمیانی مدت میں ایک واضح حکمت عملی ترتیب دی جائے گی۔عبوری قیادت کا منصوبہ کوچنگ اور تربیت کے معیار کو بلند کرنا، ادارہ جاتی ہم آہنگی کو فروغ دینا اور مستقبل کے لیے پالیسی سازی پر مشتمل ہے۔ انہوں نے کہا کہ بہتر گورننس اور وسائل کے مؤثر انتظام کے ذریعے پاکستان ہاکی فیڈریشن کو ایک مضبوط بنیاد فراہم کی جائے گی۔محی الدین احمد وانی نے یہ بھی کہا کہ کھلاڑیوں کی کارکردگی پر توجہ مرکوز رہے گی اور وہ صرف تربیت اور مقابلوں پر توجہ دیں گے جبکہ انتظامی امور عبوری قیادت سنبھالے گی۔ اس مقصد کے لیے نجی شعبے کے ساتھ تعاون اور پارٹنرشپ کو فروغ دیا جائے گا تاکہ کھلاڑیوں کے لیے ضروری سہولیات اور مالی معاونت فراہم ہو سکے۔انہوں نے زور دے کر کہا کہ تمام ادارے قومی کھیل کی بحالی کے لیے ایک پیج پر ہیں اور عبوری مدت میں شفافیت اور انصاف کے اصولوں کو مقدم رکھا جائے گا۔ انہوں نے فوری طور پر قومی ٹیم کے کپتان حماد بٹ پر عائد پابندی ختم کر دی ہے تاکہ کھلاڑی میدان میں اپنی جانفشانی دکھا سکیں۔عبوری قیادت نے یقین دہانی کرائی کہ جلد از جلد شفاف انتخابات کرائے جائیں گے تاکہ پاکستان ہاکی فیڈریشن کی نئی قیادت جمہوری طریقہ کار کے تحت منتخب ہو اور ذمہ داریاں حوالے کی جائیں۔ آخر میں وہ محترم وزیر اعظم کے اعتماد کے شکر گزار ہیں اور قوم کے ساتھ مل کر پاکستان ہاکی کی شاندار روایت واپس لانے کا عزم ظاہر کیا۔
پاکستان ہاکی فیڈریشن کے عبوری صدر کا بحالی اعلان
کوئی تبصرہ نہیں ہے۔
