چیئرمین سینیٹ سید یوسف رضا گیلانی نے اسلام آباد میں چینی سفارتخانے کی جانب سے منعقدہ تقریب میں شرکت کرتے ہوئے چین کے قیام کی سالگرہ پر قیادت اور عوام کو مبارکبادپیش کی۔ تقریب میں چینی سفیر، پارلیمانی نمائندے، سفارت کار اور مختلف شعبوں سے وابستہ شخصیات موجود تھیں۔انہوں نے خطاب میں پاک چین تعلقات کی طویل تاریخ اور باہمی اعتماد کو سراہا اور کہا کہ یہ رشتہ دونوں قوموں کے لیے فخر کا موجب ہے۔ چیئرمین سینیٹ نے چین کی قیادت، خاص طور پر صدر شی جن پنگ کی رہنمائی میں حاصل کردہ کامیابیوں کو اہم قرار دیتے ہوئے اس کا بڑی تعداد میں لوگوں کی معاشی حالت بہتر کرنے میں کردار بتایا۔انہوں نے چین کی ترقی میں کمیونسٹ پارٹی کی حکمت عملی، اصلاحات اور جدت پسندی کا ذکر کیا اور کہا کہ یہ عناصر چین کو عالمی سطح پر نمایاں مقام دلانے میں کلیدی رہے۔ پاک چین تعلقات کو انہوں نے ہمہ موسمی اسٹریٹجک شراکت داری اور آہنی بھائی چارہ قرار دیا جو اعتماد، مشترکہ اقدار اور عوامی رابطوں پر مبنی ہے۔چیئرمین سینیٹ نے قدرتی آفات اور بحرانوں میں چین کی امداد کا خصوصی شکریہ ادا کیا اور زلزلوں، سیلاب اور عالمی وبا کے دوران تعاون کو قابلِ ستائش قرار دیا۔ دفاعی شراکت داری کے حوالے سے انہوں نے جے ایف-17 تھنڈر پروگرام اور جے-10 سی طیاروں کی شمولیت کو دونوں ملکوں کے اسٹریٹجک تعاون کی مضبوط علامت بتایا۔معاشی شعبے میں انہوں نے پاک چین اقتصادی راہداری کو فلیگ شپ منصوبہ قرار دیا اور گوادر بندرگاہ کو خطے میں تجارت اور خوشحالی کا دروازہ کہا۔ انہوں نے واضح کیا کہ سی پیک صرف انفراسٹرکچر نہیں بلکہ عوامی فلاح اور مشترکہ ترقی کا منصوبہ ہے جو خطے کے روشن مستقبل کی ضمانت بھی بن سکتا ہے۔تعلیمی اور ثقافتی روابط پر گفتگو کرتے ہوئے انہوں نے کنفیوشس اداروں، تعلیمی وظائف اور تبادلوں کو عوامی رابطوں کو مضبوط بنانے والا عمل قرار دیا۔ انہوں نے بانیانِ دوستی جن میں شہید ذوالفقار علی بھٹو اور قدیم چینی رہنماؤں کا حوالہ دے کر دونوں قوموں کے باہمی احترام کو اجاگر کیا۔صدر آصف علی زرداری کے حالیہ دورے کا ذکر کرتے ہوئے انہوں نے کہا کہ اس دورے کے دوران دستخط ہونے والے معاہدے، جن میں ٹیکسٹائل پارک، لائیو اسٹاک سیکٹر کی جدیدکاری اور ایمرجنسی آلات شامل ہیں، پاکستان کی معیشت اور عوامی فلاح میں نمایاں کردار ادا کریں گے۔ چیئرمین سینیٹ نے اپنے ماضی کے تجربات کا حوالہ دیتے ہوئے کہا کہ بطور اسپیکر قومی اسمبلی اور وزیرِ اعظم چین کے ساتھ قریبی رابطے نے انہیں پاک چین تعلقات کی مضبوطی کا یقین دلایا۔آخر میں انہوں نے دو طرفہ شراکت داری کو خطے میں امن، استحکام اور معاشی انضمام کے فروغ کے لیے ضروری قرار دیتے ہوئے اس عزم کا اعادہ کیا کہ پاکستان چین کے ساتھ اپنی ہمہ موسمی اسٹریٹجک شراکت داری کو مزید فروغ دے گا اور مشترکہ عالمی چیلنجز کے حل میں تعاون جاری رکھے گا۔
پاک چین لازوال برادرانہ تعلقات کی تصدیق
کوئی تبصرہ نہیں ہے۔
