اسلام آباد: پاکستان میں بنگلہ دیشی طلبہ تنظیم (باساپ) کے صدر گوہر محمد جواد نے جنگ بندی معاہدے اور علاقائی امن کے قیام میں پاکستان کے اہم کردار کو سراہتے ہوئے اسے ایک مثبت اور مؤثر سفارتی پیش رفت قرار دیا ہے۔
اپنے بیان میں انہوں نے پاکستان کی جانب سے امن و استحکام کے فروغ کے لیے کی جانے والی کوششوں کو نہ صرف ذاتی بلکہ تنظیمی سطح پر بھی قابلِ تحسین قرار دیا۔ ان کا کہنا تھا کہ جنگ بندی پر عملدرآمد نہایت اہم ہے اور بنگلہ دیش کے عوام پاکستان کی ان مخلصانہ کاوشوں کو قدر کی نگاہ سے دیکھتے ہیں جن کے ذریعے تمام فریقین کو ایک میز پر لایا گیا۔
گوہر محمد جواد نے کہا کہ پائیدار امن صرف مکالمے اور باہمی اعتماد کے ذریعے ہی ممکن ہے اور پاکستان نے ہمیشہ ان اصولوں کے لیے اپنی وابستگی کا عملی مظاہرہ کیا ہے۔
انہوں نے اسلام آباد میں مذاکرات کی میزبانی پر پاکستان کو سراہتے ہوئے کہا کہ برادر ملک پاکستان نے خطے میں امن کے فروغ کے لیے قائدانہ کردار ادا کیا ہے۔ انہوں نے امید ظاہر کی کہ پاکستان مستقبل میں بھی ایک مستحکم اور پُرامن خطے کے قیام میں اپنا اہم کردار ادا کرتا رہے گا۔
بیان میں پاکستان اور بنگلہ دیش کے درمیان مضبوط تعلقات اور علاقائی استحکام کے لیے مشترکہ عزم کو بھی اجاگر کیا گیا۔
