پاکستان کو ASOCIO ڈیجیٹل سمٹ 2026 کی میزبانی مل گئی، ٹیک سیکٹر کے لیے بڑی کامیابی
پاکستان کو ایشیا اوشینیا کمپنی انڈسٹری آرگنائزیشن (ASOCIO) ڈیجیٹل سمٹ 2026 کی میزبانی کا اعزاز مل گیا ہے، جو اس بات کا ثبوت ہے کہ پاکستان خطے میں ابھرتی ہوئی ٹیکنالوجی طاقت کے طور پر اپنی پہچان مضبوط کر رہا ہے۔ اس فیصلے کا اعلان چائنیز تائپی میں جاری ASOCIO ڈیجیٹل سمٹ 2025 کے دوران کیا گیا، جہاں پاکستان کی کارکردگی اور نمائندگی کو بھرپور سراہا گیا۔
پاکستان سافٹ ویئر ہاؤسز ایسوسی ایشن (P@SHA)، جو ملک کے آئی ٹی اور آئی ٹی سے منسلک خدمات کے شعبے کی مرکزی ٹریڈ باڈی ہے، نے اس پیشرفت کی تصدیق کرتے ہوئے اسے پاکستان کے ڈیجیٹل صلاحیتوں پر عالمی اعتماد قرار دیا۔ چیئرمین پی@شا سجاد مصطفیٰ سید نے کہا کہ یہ انتخاب پاکستان کے ٹیک ایکو سسٹم کی بڑھتی ہوئی ساکھ کو ظاہر کرتا ہے اور اس بات کا ثبوت ہے کہ پاکستان خطے کے ٹیک ماہرین، پالیسی سازوں اور صنعتی رہنماؤں کی میزبانی کے لیے پوری طرح تیار ہے۔
ASOCIO ڈیجیٹل سمٹ 2025 میں پاکستان کی شرکت بھی غیر معمولی رہی۔ سات پاکستانی کمپنیوں نے ASOCIO ICT ایوارڈز 2025 جیت کر ملک کی ابھرتی ہوئی مہارتوں—جیسے آرٹیفیشل انٹیلیجنس، ڈیجیٹل سروسز، انٹرپرائز ٹیکنالوجیز اور دیگر جدید شعبوں—کو نمایاں کیا۔ پاکستانی آئی ٹی کمپنیوں کے 15 رکنی وفد نے مختلف ایوارڈ کیٹیگریز اور اعلیٰ سطحی مکالموں میں بھرپور نمائندگی کر کے پاکستان کی جدت اور مسابقتی صلاحیت کو مزید مضبوط کیا۔
اس دوران پی@شا نے ASOCIO کے چیئرمین اسٹین سنگھ سمیت جاپان، کوریا، سنگاپور، ملائیشیا اور دیگر رکن ممالک کے وفود سے اہم ملاقاتیں کیں۔ ان ملاقاتوں میں ڈیجیٹل پالیسی ہم آہنگی، اعلیٰ تکنیکی صلاحیت کے فروغ، اور سرحد پار ڈیجیٹل تجارت کے نئے مواقع پر بات چیت ہوئی۔ پی@شا نے CISA اور ایشیا پیسیفک کی دیگر صنعتی تنظیموں کے ساتھ مشترکہ منصوبوں، بی پی او شراکت داریوں اور ٹیک ٹیلنٹ موبیلیٹی پروگراموں کا بھی جائزہ لیا۔
سمٹ میں پاکستان کی ڈیجیٹل صلاحیتیں خصوصی طور پر نمایاں رہیں۔ پی@شا نے ملک کی بڑھتی ہوئی آئی ٹی برآمدات، تیزی سے پھیلتی کارپوریٹ بیس، اور ہنر مند ورک فورس کو اجاگر کیا۔ تین ہزار سے زائد رجسٹرڈ آئی ٹی کمپنیاں، چھ لاکھ سے زیادہ ٹیک پروفیشنلز، فعال اسٹارٹ اپ ایکو سسٹم، اور خطے کی سب سے نوجوان و تیزی سے بڑھتی ہوئی ڈیجیٹل افرادی قوت نے پاکستان کو ایک مضبوط اور تیزی سے ترقی کرتے ہوئے ٹیک ہب کے طور پر پیش کیا۔
SIFC، وزارت آئی ٹی و ٹیلی کام، پی ایس ای بی اور ٹیک ڈیسٹی نیشن پاکستان کی معاونت سے پی@شا مختلف اسٹریٹجک اقدامات کو آگے بڑھا رہی ہے جن میں مشرقی ایشیا اور اوشینیا میں آئی ٹی برآمدات کا تنوع، پاکستانی اور ASOCIO رکن اسٹارٹ اپس کے درمیان رابطے، ویزا ریفارمز اور آئی پی پروٹیکشن کے لیے پالیسی ایڈووکیسی، اور جینیریٹو اے آئی، بلاک چین اور ڈیٹا اینالیٹکس جیسے شعبوں میں اعلیٰ مہارتوں کی تربیت شامل ہے۔
ASOCIO ڈیجیٹل سمٹ 2026 کی میزبانی کو پاکستان کی آئی ٹی صنعت کے لیے ایک بڑا موقع سمجھا جا رہا ہے، جو نہ صرف علاقائی ڈیجیٹل تعاون میں پاکستان کا کردار بڑھائے گا بلکہ عالمی ٹیکنالوجی منظرنامے میں ملک کے قدم مزید مضبوط کرے گا۔
