مصنوعی ذہانت کے دور میں پاکستانی طلبہ کا مستقبل
پاکستان میں مصنوعی ذہانت اب کوئی مستقبل کا خواب نہیں رہی، بلکہ یہ ایک خاموش انقلاب کی صورت میں ہماری روزمرہ زندگی، روزگار کے مواقع، کاشتکاری اور تعلیم کے نظام کو بدل رہی ہے۔ حکومت نے حال ہی میں اے آئی پالیسی 2025 متعارف کروائی ہے جس کے تحت نوجوانوں کو جدید مہارتوں سے آراستہ کرنا، تعلیم میں جدت لانا اور ڈیجیٹل اکانومی میں پاکستان کی شمولیت کو یقینی بنانا مقصود ہے۔ اس پروگرام کے تحت سمارٹ کلاس رومز، اسٹیم لیبز اور ای لرننگ پلیٹ فارمز جیسے اقدامات کیے جا رہے ہیں جبکہ اران پاکستان جیسے منصوبے کے ذریعے جدید تعلیمی حبز اور ڈیجیٹل ڈیش بورڈز پر سرمایہ کاری جاری ہے۔ اگرچہ پالیسی خوش آئند اور جرات مندانہ ہے، لیکن عملی طور پر کئی تعلیمی اداروں میں حالات مختلف نظر آتے ہیں۔
ملک کے بیشتر تعلیمی اداروں میں اے آئی کورسز تو نصاب میں شامل ہیں لیکن یہ اکثر پرانے طریقوں اور تھیوری تک محدود رہتے ہیں۔ عملی پروجیکٹس، جدید پروگرامنگ زبانوں اور انڈسٹری سے رابطے کا فقدان ہے، جس کے باعث گریجویٹس مارکیٹ کی اصل ضروریات پوری کرنے میں ناکام رہ جاتے ہیں۔ اس خلا کو پُر کرنے کے لیے نوجوان آن لائن کورسز، یوٹیوب ٹیوٹوریلز اور بین الاقوامی لیمنگ پلیٹ فارمز کا رخ کر رہے ہیں کیونکہ وہ سمجھ چکے ہیں کہ روایتی ڈگری ہی کافی نہیں۔
جو طلبہ اس سمت میں فعال ہیں ان کے لیے مواقع کی کوئی کمی نہیں۔ ڈیجیٹل اکانومی میں سرحدوں کی کوئی قید نہیں اور فری لانس مارکیٹ میں اے آئی سے متعلقہ کام کی بھرمار ہے۔ کراچی کا نوجوان سلیکون ویلی کی کسی کمپنی کے لیے اے آئی ماڈلز تیار کر سکتا ہے، لاہور کا گریجویٹ عالمی تحقیقی منصوبے کا حصہ بن سکتا ہے۔ پاکستانی اسٹارٹ اپس بھی بین الاقوامی کانفرنسوں میں اپنی شناخت بنا چکے ہیں جو اس بات کا ثبوت ہے کہ ہمارے طلبہ مقابلہ کرنے کی صلاحیت رکھتے ہیں۔
تاہم صرف جذبہ کافی نہیں، دیگر چیلنجز جیسا کہ غیر مستحکم انٹرنیٹ، جدید کمپیوٹنگ وسائل کی کمی اور عالمی ادائیگیوں کا مشکل نظام نوجوانوں کی راہ میں حائل ہیں۔ ان مسائل کا حل صرف پالیسی سازی سے نہیں نکلے گا بلکہ باقاعدہ انفراسٹرکچر میں سرمایہ کاری، اساتذہ کی تربیت، نجی و سرکاری تعاون اور رٹے کی کلچر سے نکل کر تخلیقی سوچ اپنانا ہوگا۔
مصنوعی ذہانت کو انسانی صلاحیتوں کے لیے ایک خطرہ نہیں بلکہ مددگار سمجھا جانا چاہیے۔ حکومت اور تعلیمی اداروں کے ساتھ ساتھ اس تبدیلی کی ذمہ داری خود طلبہ پر بھی عائد ہوتی ہے۔ آج معیاری آن لائن کورسز، اوپن سورس پراجیکٹس اور اے آئی ٹولز سب کے لیے میسر ہیں اور صحیح سمت میں خود کوشش کرنا ہی سب سے قیمتی صلاحیت ہے۔ جو نوجوان صرف نظام کی تبدیلی کے انتظار میں بیٹھے رہیں گے وہ پیچھے رہ جائیں گے، جبکہ سیکھنے اور جدت لانے والے مستقبل تشکیل دیں گے۔
پاکستان کا اے آئی سے جڑے مستقبل کا فیصلہ تقاریر یا نعروں سے نہیں بلکہ اپنے طلبہ کی تیاری، قیادت اور مسابقت سے مشروط ہے۔ 2025 صرف ایک سال نہیں بلکہ ایک فیصلہ کن لمحہ ہے۔ ہمارے نوجوان اس ٹیکنالوجی انقلاب کے محض سوار بنیں گے، یا اسے چلائیں گے؟ مستقبل کا تعین آج ہو رہا ہے اور فیصلہ طلبہ کے ہاتھ میں ہے۔
