ٹریڈ ڈویلپمنٹ اتھارٹی آف پاکستان (TDAP) کے سیکریٹری شیریار تاج نے کراچی میں جمہوریہ ترکی کے کمرشل اتاشی مراد اوزمان سے ملاقات کی، جس میں دونوں ممالک کے درمیان تجارت کے فروغ، باہمی تعاون بڑھانے اور تجارتی رکاوٹیں دور کرنے پر اتفاق کیا گیا۔
ملاقات کے دوران فریقین نے فیصلہ کیا کہ دو طرفہ تجارتی تعاون کو مزید وسعت دینے کے لیے نئی صنعتوں اور شعبوں کی تلاش کی جائے گی اور ایسے شعبے متعین کیے جائیں گے جہاں دونوں ممالک مل کر کام کرسکیں۔ اس کے علاوہ پاکستان اور ترکی کی بزنس کمیونٹیز کے درمیان B2B روابط مضبوط بنانے، دونوں ملکوں کی تجارتی نمائشوں اور پروموشنل ایونٹس میں شرکت کو فروغ دینے پر بھی اتفاق ہوا۔
اس سلسلے میں لاہور میں ہونے والی ترک مصنوعات کی نمائش اور کراچی میں منعقد ہونے والے ‘فوڈ ایگ 2025’ کو بھی خاص طور پر اہمیت دی جائے گی، جہاں دونوں ممالک کو کاروباری مواقع تلاش کرنے اور سرمایہ کاری کے فروغ کا موقع فراہم ہوگا۔ دونوں رہنماؤں نے اس بات پر زور دیا کہ دوطرفہ تجارت کی راہوں میں حائل رکاوٹوں کو دور کرنے کے لیے مشترکہ کوششیں جاری رہیں گی۔
