نیشنل یونیورسٹی آف سائنسز اینڈ ٹیکنالوجی (نسٹ) کے پلیسمنٹ آفس نے امل اکیڈمی کے اشتراک سے امل کیرئیر پریپ فیلوشپ پروگرام کا کامیاب انعقاد کیا۔ اس پروگرام میں 140 سے زائد طلباء و طالبات نے شرکت کی، جنہیں آج کے مسابقتی دور کی ملازمتوں کے لیے اہم پیشہ ورانہ مہارتوں سے روشناس کرایا گیا۔
پروگرام کے تربیتی سیشن نسٹ میں ہی منعقد کیے گئے، جس سے طلبا کو اپنی تعلیمی مصروفیات کے ساتھ ساتھ ایک فعال اور معروف تعلیمی ماحول میں سیکھنے کا موقع ملا۔ امل کیرئیر پریپ فیلوشپ، امل اکیڈمی کا نمایاں پروگرام ہے، جو اسٹینفورڈ یونیورسٹی کی معاونت سے چلایا جاتا ہے۔ اس پروگرام کا مقصد تعلیمی ماحول اور عملی پیشہ ورانہ تقاضوں کے درمیان موجود خلا کو پُر کرنا ہے۔
تین ماہ پر مشتمل اس تربیت میں شرکاء کو ابلاغ، قیادت، مسائل کے حل، ٹیم ورک، جذباتی ذہانت اور کیرئیر ڈویلپمنٹ جیسے موضوعات پر بھرپور تربیت دی گئی۔ پروگرام کے دوران ویک اینڈ پر ہونے والے انٹر ایکٹو سیشنز، عملی منصوبہ جات، موک انٹرویوز، ریزیومے بنانے کی ورکشاپس اور گروہی کام نے طلبہ کی پیشہ ورانہ دنیا سے براہ راست شناسائی میں مدد فراہم کی۔
فیلوشپ میں ہمدردی، ذمہ داری اور خود آگہی جیسے اقدار پر بھی خصوصی توجہ دی گئی، تاکہ طلبہ محض نوکری کے حصول تک محدود نہ رہیں بلکہ ایک بامقصد زندگی گزارنے اور معاشرے میں مثبت کردار ادا کرنے کے قابل بن سکیں۔
یہ اشتراک نسٹ کی طالب علموں کی کامیابی اور صنعتی تقاضوں سے ہم آہنگی کے عزم کی ترجمانی کرتا ہے، جو گریجویٹس کو متحرک پیشہ ورانہ ماحول میں کامیابی کے لئے بہترین ہنر اور سوچ فراہم کرتا ہے۔
