چی میں نیشنل انکیوبیشن سینٹر (این آئی سی) کراچی، جو وزارت آئی ٹی و ٹیلی کام کے تحت اگنائٹ کا منصوبہ ہے، نے ایک اہم سنگ میل عبور کرتے ہوئے اپنی پہلی سالگرہ اور 12ویں کوہورٹ کے 30 اسٹارٹ اپس کی گریجویشن تقریب منعقد کی۔
تقریب کی مہمان خصوصی وفاقی وزیر برائے آئی ٹی و ٹیلی کام شازہ فاطمہ خواجہ تھیں جبکہ سی ای او اگنائٹ رفیق احمد بُریرو، نائب صدر ایل ایم کے ٹی عاصم اسحاق خان، سرمایہ کاروں اور انڈسٹری کے ماہرین سمیت اسٹارٹ اپ ایکو سسٹم کے دیگر رہنما بھی شریک ہوئے۔
وفاقی وزیر نے اپنے خطاب میں وزیراعظم کے ڈیجیٹل پاکستان وژن کو اجاگر کرتے ہوئے کہا کہ یہ اسٹارٹ اپس نہ صرف روزگار کے مواقع پیدا کر رہے ہیں بلکہ عالمی سطح پر پاکستان کی صلاحیتوں کو بھی نمایاں کر رہے ہیں۔ انہوں نے یقین دلایا کہ وزارت آئی ٹی وزیراعظم محمد شہباز شریف کی قیادت میں نوجوانوں کو بااختیار بنانے اور نالج بیسڈ ڈیجیٹل اکانومی کے قیام کے لیے پرعزم ہے۔
سی ای او اگنائٹ رفیق احمد بُریرو نے کہا کہ این آئی سی کراچی اس بات کی مثال ہے کہ کس طرح پبلک پرائیویٹ پارٹنرشپ پاکستان میں انٹرپرینیورشپ کو فروغ دے سکتی ہے۔ انہوں نے کہا کہ اگنائٹ پاکستان بھر میں اسٹارٹ اپس کو سپورٹ، رہنمائی اور سرمایہ کاروں تک رسائی فراہم کرتا رہے گا تاکہ وہ عالمی سطح پر مسابقتی حل تخلیق کر سکیں۔
ایل ایم کے ٹی کے نائب صدر عاصم اسحاق خان نے کہا کہ وائی بی جی اور اوربٹ اسٹارٹ اپس کے ساتھ شراکت داری نے این آئی سی کراچی کے سفر کو مزید مضبوط بنایا ہے۔ ان کے مطابق کوہورٹ 12 کی کامیابیاں اس بات کا ثبوت ہیں کہ درست ایکو سسٹم اور سرمایہ کاروں تک رسائی سے پاکستانی اسٹارٹ اپس عالمی مقابلے کے قابل ہو سکتے ہیں۔
تقریب میں کوہورٹ 12 کے اسٹارٹ اپس کی کامیابیوں کو سراہا گیا اور ان کے عالمی اور مقامی سطح پر توسیع کے عزم کو اجاگر کیا گیا۔ سابق طلبہ کی کہانیاں بھی پیش کی گئیں جن سے ظاہر ہوا کہ این آئی سی کراچی کس طرح روزگار کے مواقع، آمدنی اور انڈسٹری میں جدت کا ذریعہ بن رہا ہے۔
اپنے قیام سے اب تک این آئی سی کراچی نے 375 سے زائد اسٹارٹ اپس انکیوبیٹ کیے ہیں، 10 ارب روپے سے زیادہ آمدنی پیدا کی ہے، 12 ارب روپے سے زائد سرمایہ کاری حاصل کی ہے اور ایک ملین سے زائد ملازمتیں پیدا کی ہیں۔ یہ مرکز فِن ٹیک، انڈسٹریل آٹومیشن اور میڈیا کے جدید لیبز، سرمایہ کاروں تک رسائی، قانونی و مالی مشاورت اور رہنمائی جیسی سہولیات بلا معاوضہ فراہم کر رہا ہے۔
تقریب حکومت کے اس عزم کی غمازی کرتی ہے کہ نوجوانوں کو ٹیکنالوجی اور انوویشن کے ذریعے بااختیار بنایا جائے، تاکہ وزیراعظم کے وژن کے مطابق ڈیجیٹل، نالج بیسڈ معیشت تشکیل دی جا سکے۔
