قومی کمیشن برائے خواتین کے مشاورتی اجلاس کے دوسرے روز فیصلہ کیا گیا کہ پاکستان اپنا پہلا قومی صنفی توازن (Gender Parity) رپورٹ جاری کرے گا جو عالمی یومِ خواتین کے موقع پر منظرِ عام پر آئے گی۔ اجلاس میں صنفی ڈیٹا کو عالمی معیارات کے مطابق ہم آہنگ کرنے اور اس کے ذریعے اصلاحات، جوابدہی اور پائیداری یقینی بنانے پر زور دیا گیا۔
وزیر اعظم کے مشیر برائے قانون اعظم نصیر تارڑ نے کہا کہ صنفی امتیاز پاکستان کی ترقی کی سب سے بڑی رکاوٹ ہے اور یہ فریم ورک اصلاحات اور جوابدہی کے لیے کارگر آلہ ثابت ہوگا۔ نییشنل کمیشن برائے خواتین کی چیئرمین اُم لیلیٰ ازہر نے کہا کہ پاکستان کو صنفی اعداد و شمار کو عالمی معیارات کے مطابق ہم آہنگ کرنا ہوگا تاکہ خواتین کو حقیقی معنوں میں بااختیار بنانے والی پالیسیاں تیار کی جا سکیں۔ سیکرٹری حمیرا ضیاء مفتی نے اس عزم کا اظہار کیا کہ صنفی ڈیٹا کو بین الاقوامی معیار کے مطابق لانے کے لیے اقدامات کیے جائیں گے تاکہ جوابدہی اور پائیداری برقرار رہیں۔
دن کے سیشن میں وائزہ رفیق، این سی ایس ڈبلیو کی قانونی ماہر، کی زیرِ رہنمائی ایک متحرک پینل بحث بھی منعقد ہوئی جس میں مختلف شعبوں کے ماہرین نے صنفی اعداد و شمار کے معیار، دستیابی اور استعمال کے مسائل پر روشنی ڈالی۔ ڈاکٹر علیہ خان نے کہا کہ قابلِ اعتماد صنفی اشارے (indicators) کے بغیر خواتین کا اقتصادی کردار کم تر اور غیر مرئی رہ جاتا ہے۔ رفیق چاندیو نے صوبائی سطح پر اعداد و شمار جمع کرنے میں درپیش مشکلات کا تذکرہ کرتے ہوئے کہا کہ ڈیٹا کو ہم آہنگ کرنا پاکستان کی بین الاقوامی ساکھ کے لیے ضروری ہے۔ سمن احسن نے واضح کیا کہ جب ڈیٹا موجود نہیں ہوتا تو خواتین کی حقیقی صورتحال پالیسی سازی سے خارج ہو جاتی ہے۔
پاکستان بیورو آف اسٹیٹسٹکس کے ڈائریکٹر جنرل عمران سلیم نے کہا کہ متحدہ رپورٹنگ سے پاکستان کی امیج اور جوابدہی مضبوط ہوگی۔ یو این ایف پی اے کے مقدر شاہ نے اپنے تجربے کی بنیاد پر بتایا کہ وہ ممالک کامیاب ہوتے ہیں جہاں صنفی ڈیٹا اصلاحات کو آگے بڑھانے میں مرکزی کردار ادا کرتا ہے اور پاکستان اس راستے پر قدم بڑھا رہا ہے۔
اجلاس کے اختتام پر شرکا نے ایک سادہ، قابلِ موازنہ اور پائیدار فریم ورک اپنانے پر اتفاق کیا جس کا مقصد صنفی ڈیٹا کو اصلاح، جوابدہی اور ترقی کے حقیقی عمل میں تبدیل کرنا ہے۔
