پارلیمنٹ ہاؤس میں منعقدہ اجلاس میں رکن قومی اسمبلی انجم عقیل خان نے متاثرین سی ڈی اے کے دیر سے حل ہونے والے معاملات اور ان کے حقوق تفصیل سے کمیٹی کے سامنے پیش کیے۔ انجم عقیل خان نے متاثرہ خاندانوں کی نمائندگی کرتے ہوئے کہا کہ متاثرین سی ڈی اے کے حقوق مزید نظر انداز نہیں کیے جا سکتے اور فوری اصلاحات ناگزیر ہیں۔اجلاس کی صدارت راجہ خرم نواز نے کی جبکہ بیریسٹر عقیل ملک، وزیر مملکت داخلہ طلال چوہدری، چیئرمین قائمہ کمیٹی برائے فیڈرل کیبنٹ ملک ابرار احمد، چیف کمشنر اسلام آباد اور چیئرمین سی ڈی اے محمد علی رندھاوا سمیت متعلقہ افسران بھی شریک تھے۔ اجلاس میں متاثرین سی ڈی اے کے نمائندگان ملک ظہیر، ملک محمد اشرف، ملک عمران، راجہ فیضان، ملک ابرار، راجہ بابر اور راجہ طاہر بھی موجود تھے۔کمیٹی نے اس بات پر اتفاق کیا کہ سی ڈی اے آئندہ تمام فیصلوں میں متعلقہ رکن قومی اسمبلی کو اعتماد میں لے گا اور ترقیاتی، مالی و الاٹمنٹ کے فیصلے منتخب نمائندوں کی مشاورت سے کیے جائیں گے۔ اسی عزم کے تحت سی ڈی اے چیئرمین نے یقین دہانی کرائی کہ متاثرین کو موجودہ مارکیٹ ریٹ کے مطابق معاوضہ دیا جائے گا اور موجودہ زمروں کی تقسیم ختم کر کے نیا سروے کرایا جائے گا جس کی بنیاد پر حقوق فراہم کیے جائیں گے۔چیئرمین سی ڈی اے نے کہا کہ تمام زیر التوا الاٹمنٹ لیٹرز اور ادائیگیاں جلد نمٹائی جائیں گی اور سیکٹرز کی ترقیاتی رفتار میں تیزی لائی جائے گی۔ کمیٹی نے اس بات پر بھی غور کیا کہ ارکان اسمبلی کی مشاورت سے تاخیر شدہ امور کو ترجیحی بنیادوں پر حل کیا جائے گا۔ چند سرکاری افسران کی بیرونِ ملک ذمہ داریوں کے باعث چند روزہ وقفے کی درخواست مؤخذ رہی جس کے بعد کام تیزی سے آگے بڑھایا جائے گا۔اجلاس کے دوران بیریسٹر عقیل ملک اور ملک ابرار احمد نے انجم عقیل خان کی متاثرین کی نمائندگی کو سراہا اور کہا کہ انہوں نے متاثرین کے حقیقی نمائندے کا کردار ادا کیا۔ انجم عقیل خان نے اجلاس میں واضح کہا کہ وہ متاثرین سی ڈی اے کے حقوق کا ہر فورم پر دفاع جاری رکھیں گے اور چاہے معاوضہ ہو، الاٹمنٹ ہو یا ترقیاتی کام، عوام کے مسائل حل کرانا ان کی اولین ترجیح ہے۔کمیٹی نے یہ بھی متعین کیا کہ فیڈرل گورنمنٹ ہاؤسنگ اتھارٹی کے متاثرین کے معاملات کا فیصلہ بھی اسی کمیٹی کے ذریعے کیا جائے گا تاکہ تمام متاثرین کو مساوی بنیادوں پر جلد ریلیف فراہم کیا جا سکے۔ متاثرین سی ڈی اے کے حقوق کے تحفظ اور دہائیوں سے التواء میں رہنے والے امور کے حل کے لیے آج کے اجلاس کو پیش رفت قرار دیا جا رہا ہے۔
قومی اسمبلی کی کمیٹی نے متاثرین سی ڈی اے کے حقوق کا بڑا فیصلہ
کوئی تبصرہ نہیں ہے۔
