ٹی وی ٹی اے پنجاب نے متعلقہ صنعتی شعبوں کے نمائندوں کے ساتھ مل کر شاہدرہ میں واقع بنائی ادارے کی جدید کاری کے حوالے سے مشاورتی اجلاس منعقد کیا جس کا مقصد تربیتی سہولتوں اور نصاب کو قومی و بین الاقوامی معیار کے مطابق بہتر بنانا تھا۔سیکرٹری سکلز ڈیویلپمنٹ اینڈ ایجوکیشن جناب نادر چٹھہ کی موجودگی میں اجلاس میں چیئرمین ٹی وی ٹی اے بریگیڈیئر محمد ساجد کھوکھر ریٹائرڈ اور سینیئر ڈائریکٹر جنرل اختر عباس بھروانہ سمیت صنعت کے اہم نمائندوں نے شرکت کی اور بھرپور تبادلہ خیال کیا گیا۔ایس ڈی جی ٹی وی ٹی اے نے بنائی ادارے شاہدرہ کی موجودہ صورتحال اور مستقبل کے لیے تیار کردہ منصوبہ بندی پر تفصیلی پیشکش کی، جس میں تربیتی ورکشاپس، مشینری کی جدید کاری اور نصاب کی ہم آہنگی کو خاص اہمیت دی گئی۔ اس پیشکش میں ادارے کی فوری اور طویل مدتی ضروریات واضح کی گئیں تا کہ بنائی ادارہ شاہدرہ صنعتی تقاضوں کے مطابق تربیت فراہم کرسکے۔اجلاس کے دوران شرکائے اجلاس نے مختلف تجاویز پیش کیں جن میں فیکٹری سطح کے معیارات کے نفاذ، اساتذہ کی تربیت، جدید آلات کی فراہمی اور مارکیٹ کی مانگ کے مطابق مہارتوں کے اضافے پر زور دیا گیا۔ ان تجاویز کا مقصد بنائی ادارہ شاہدرہ کو موجودہ اور مستقبل کی صنعتی ضرورتوں کے مطابق ڈھالنا تھا تاکہ طلبہ کو روزگار کے مواقع میسر آئیں۔شرکائے اجلاس نے ایک عملیاتی کمیٹی تشکیل دینے کا فیصلہ کیا جو ادارے کی جدید کاری کے حوالے سے تفصیلی سفارشات مرتب کرے گی اور فوری اقدامات کے لیے روڈ میپ پیش کرے گی۔ یہ قدم ٹی وی ٹی اے پنجاب کی اس مستقل کوشش کا حصہ ہے کہ تربیت اور تربیتی ادارے بین الاقوامی اور قومی معیار کے مطابق ہوں۔
حکومتی بنائی ادارے کی جدید کاری کے لیے اجلاس
کوئی تبصرہ نہیں ہے۔
