وفاقی وزیر مملکت برائے موسمیاتی تبدیلی، ڈاکٹر شذرا منصب علی خان نے مینگورہ شہر کا دورہ کیا اور حالیہ سیلاب سے متاثرہ خاندانوں سے ملاقات کی۔ اس موقع پر انہوں نے حکومت کی جانب سے متاثرین کے بھرپور تعاون اور بحالی کے عزم کا اعادہ کیا۔ ڈاکٹر شذرا نے کہا کہ موسمیاتی تبدیلی کے بڑھتے ہوئے اثرات سے کمزور آبادیوں کا تحفظ حکومت کی اولین ترجیح ہے۔
وزیر مملکت نے مینگورہ میں جاری ملک گیر مون سون شجرکاری مہم "ایک بیٹی، ایک شجر” میں بھی حصہ لیا۔ اس مہم کا آغاز وزیر اعظم کی سرپرستی میں کیا گیا ہے، جس کا مقصد پورے ملک میں 4 کروڑ 10 لاکھ درخت لگانا ہے۔ اس کوشش کا مقصد ماحولیاتی تحفظ، ماحولیاتی نظام کی بحالی اور عوامی شمولیت کو فروغ دینا ہے تاکہ پاکستان میں موسمیاتی تبدیلیوں کا مقابلہ کیا جا سکے۔
اس موقع پر وفاقی سیکرٹری برائے موسمیاتی تبدیلی، عائشہ حمیرا مورانی بھی شریک تھیں، جنہوں نے شجرکاری مہم اور متاثرہ علاقوں میں بحالی کی کوششوں میں حکومتی عزم کو مزید اجاگر کیا۔
