نیشنل پروڈکٹویٹی آرگنائزیشن (این پی او) پاکستان
نیشنل پروڈکٹویٹی آرگنائزیشن (این پی او) پاکستان بطور مرکزی نگران اور نافذ کنندہ ادارہ، جاپان کی ایشیائی پیداواریت تنظیم اور لاہور یونیورسٹی آف مینیجمنٹ سائنسز (لمز) کے اشتراک سے “بین الاقوامی کانفرنس برائے سبز پیداواریت 2.0” کا انعقاد 28 اور 29 نومبر کو لاہور میں کر رہا ہے۔ یہ دو روزہ عالمی کانفرنس لمز میں منعقد ہوگی۔
اس کانفرنس میں 80 سے زائد غیر ملکی ماہرین اور مندوبین، رکن ممالک، ایشیا اور بحرالکاہل کے ممتاز محققین شرکت کریں گے۔ اٹلی، جاپان، تھائی لینڈ، چین اور پاکستان سمیت 21 ممالک کے ماہرین پائیدار ترقی، گردشی معیشت، وسائل کے مؤثر استعمال اور سبز پیداواریت کے جدید عالمی رجحانات پر اپنے تجربات پیش کریں گے۔
وفاقی وزارتِ صنعت و پیداوار، وزارتِ منصوبہ بندی، ترقی و خصوصی اقدامات، وزارتِ توانائی، وزارتِ پیٹرولیم اور وزارتِ موسمیاتی تبدیلی کے اعلیٰ حکام کی شرکت اس بات کو ظاہر کرتی ہے کہ حکومت پاکستان سبز پیداواریت 2.0 کے قومی وژن کو عملی شکل دینے کے لیے مکمل طور پر پُرعزم ہے۔
کانفرنس کے دوران صنعتی شعبے میں کاربن کے اخراج میں کمی اور سبز ہائیڈروجن کے کردار، وسائل کے پائیدار استعمال، مالیاتی اداروں کے کردار، اور صنعتی پیداوار، مسابقت اور برآمدات میں بہتری کے لیے ماحولیاتی، سماجی اور انتظامی ڈھانچوں کے اطلاق جیسے اہم موضوعات پر تفصیلی گفتگو کی جائے گی۔
این پی او پاکستان کے سربراہ عالمگیر چوہدری اور لمز انرجی انسٹیٹیوٹ کے سینئر مشیر ڈاکٹر فیاض چوہدری نے اپنے مشترکہ بیان میں کہا کہ یہ کانفرنس پاکستان میں سبز پیداواریت کے فروغ، ماحول دوست ٹیکنالوجیز کے استعمال، صنعتی جدت اور پائیدار ترقی کی سمت میں ایک اہم سنگِ میل ثابت ہوگی۔
بین الاقوامی سبز پیداواریت 2.0 کانفرنس حکومت، صنعت، تعلیمی اداروں اور عالمی شراکت داروں کے درمیان تعاون، علم و تجربے کے تبادلے اور پائیدار صنعتی ترقی کے نئے امکانات کو اجاگر کرے گی۔
لاہور میں بین الاقوامی سبز پیداواری کانفرنس
کوئی تبصرہ نہیں ہے۔
