آستانہ اور بیجنگ کے درمیان تجارتی تعلقات مزید مستحکم کرنے کے لیے قازقستان اور چین کا آٹھواں بزنس کونسل اجلاس بیجنگ میں منعقد ہوا۔ اس اہم اجلاس میں قازقستان کے صدر قاسم جومارت توقایف اور چین کے پہلے نائب وزیراعظم ڈنگ شوئے شیانگ نے شرکت کی۔ اجلاس میں دونوں ممالک کے سرکاری اداروں اور کاروباری شعبے کے 500 سے زائد نمائندوں نے شرکت کی، جن میں چین کی 70 سے زائد بڑی کمپنیوں کے سربراہ بھی شامل تھے۔
قازقستان کے صدر قاسم جومارت توقایف نے اجلاس سے خطاب کرتے ہوئے کہا کہ چین قازقستان کا قابل اعتماد ہمسایہ، قریبی دوست اور ہمیشہ کے لیے اسٹریٹجک شراکت دار ہے۔ ان کا کہنا تھا کہ دونوں ممالک کے درمیان دیرینہ دوستی اور تعاون کاروبار اور سرمایہ کاری کے شعبے میں بھی ترقی کی نئی راہیں کھول رہا ہے۔
صدر توقایف نے اپنے خطاب میں قازقستان کی سرمایہ کاری کے مواقع بھی پیش کیے، جس سے چینی سرمایہ کاروں کی توجہ حاصل کرنے کی کوشش کی گئی۔ انہوں نے اس بات پر بھی زور دیا کہ چین اور قازقستان کے تعلقات وقت کے ساتھ مزید مضبوط ہوتے جا رہے ہیں، اور دونوں ممالک باہمی مفاد کے منصوبوں پر مل کر کام کر رہے ہیں۔
اجلاس میں قازقستان اور چین کے کاروباری نمائندوں نے دو طرفہ تجارت و سرمایہ کاری کو فروغ دینے کے لیے مختلف تجاویز پر تبادلۂ خیال کیا اور مستقبل میں باہمی تعاون کو بڑھانے کے عزم کا اظہار کیا۔
