میڈیکل ٹربیونل اسلام آباد میں دو ٹیکنیکل ممبران کی تین سالہ تعیناتی، حکومت کا نوٹیفکیشن جاری
اسلام آباد — حکومتِ پاکستان نے میڈیکل ٹربیونل اسلام آباد میں دو نئے ٹیکنیکل ممبران کی تعیناتی کا باضابطہ نوٹیفکیشن جاری کر دیا ہے۔ یہ تعیناتیاں وزیراعظم کے اس اختیار کے تحت کی گئی ہیں جو انہیں میڈیکل ٹربیونل ایکٹ 2020 کی دفعہ 4(4) کے تحت حاصل ہے۔
وزارتِ قانون و انصاف کی جانب سے جاری نوٹیفکیشن میں بتایا گیا ہے کہ ڈاکٹر محمد امجد اور جناب منہاج السراج کو ممبر ٹیکنیکل (MP-II) تعینات کر دیا گیا ہے۔ دونوں شخصیات کو تین سال کے لیے مقرر کیا گیا ہے اور ان کی مدت کا آغاز اُس دن سے ہوگا جب وہ اپنے عہدوں کا چارج سنبھالیں گے۔
نوٹیفکیشن 17 نومبر کو سیکشن آفیسر علی حیدر چٹھہ کے دستخط سے جاری ہوا، جسے اشاعت کے لیے پرنٹنگ کارپوریشن آف پاکستان کو بھی بھیج دیا گیا ہے۔ اس کے علاوہ نوٹیفکیشن کی نقول وزیراعظم آفس، وزارتِ نیشنل ہیلتھ سروسز، چیئرمین میڈیکل ٹربیونل، آڈیٹر جنرل پاکستان ریونیو، رجسٹرار سپریم کورٹ، اور رجسٹرار میڈیکل ٹربیونل سمیت مختلف اہم سرکاری دفاتر کو بھی ارسال کی گئی ہیں۔
یہ تعیناتیاں حکومتی کوششوں کا حصہ ہیں جن کا مقصد میڈیکل ٹربیونل کی تکنیکی اور انتظامی صلاحیتوں کو مضبوط کرنا اور صحت کے شعبے سے متعلق پیشہ ورانہ و ریگولیٹری معاملات کو مزید مؤثر انداز میں نمٹانا ہے۔
