ڈسٹرکٹ ہیلتھ آفس اسلام آباد وزارتِ صحت کے تعاون سے ہائی رسک علاقوں اور شہر بھر میں ڈینگی کے خاتمے کے لیے خصوصی سویپ آپریشنز جاری رکھے ہوئے ہے۔ ٹیمیں گھر گھر جا کر سرویلنس، لاروا تلفی، اسپرے، فوگنگ اور کمیونٹی آگاہی مہمات انجام دے رہی ہیں جبکہ انتظامیہ SOPs کی خلاف ورزی کرنے والوں کے خلاف سخت کارروائی کر رہی ہے۔ عوام سے اپیل ہے کہ احتیاطی تدابیر اختیار کریں تاکہ ڈینگی کے پھیلاؤ کو روکا جا سکے۔
آپریشنز کی تفصیل کے مطابق فیلڈ ٹیمیں متعین شدہ ہائی رسک علاقوں میں مسلسل گشت کر رہی ہیں اور متاثرہ مقامات پر لاروا تلفی، اسپرے اور فوگنگ کے ساتھ ساتھ رہائشیوں کو آگاہی فراہم کی جا رہی ہے۔ گھر گھر سرویلنس کے ذریعے ممکنہ کیسز کی شناخت اور بروقت ریسپانس پر زور دیا جا رہا ہے تاکہ وبائی خطرات کو کم کیا جا سکے۔
انٹومولوجسٹ قاسم شجرا نے یونین کونسل بارہ کہو کے مختلف علاقوں کا دورہ کیا اور کیس ریسپانس سرگرمیوں اور فیلڈ ٹیمز کی کارکردگی کا جائزہ لیا۔ دورے کا مقصد ڈینگی کنٹرول اقدامات کی افادیت بڑھانا اور زمینی سطح پر موجود خامیوں کی نشاندہی کر کے انہیں دور کرنا ہے۔
ڈسٹرکٹ انتظامیہ نے SOPs کی خلاف ورزی کرنے والوں کے خلاف سخت رویہ اپناتے ہوئے بھاری جرمانے عائد کیے اور متعدد مقامات پر FIRs بھی درج کی گئی ہیں۔ انتظامیہ نے شہریوں پر زور دیا ہے کہ وہ ضوابط کی پابندی کریں تاکہ آئندہ کسی ناخوشگوار صورتحال سے بچا جا سکے۔
ڈینگی سے بچاؤ کے لیے احتیاطی تدابیر:
پانی رکھنے والے برتن، ٹینک، گملے اور کولرز کو روزانہ صاف رکھیں۔
پوری آستین والے کپڑے پہنیں تاکہ بدن کا زیادہ حصہ ڈھانپا رہے۔
مچھر مار سپرے اور لوشن کا مستقل استعمال کریں۔
رات کو سوتے وقت مچھر دانی کا استعمال یقینی بنائیں۔
کھڑکیوں اور دروازوں پر جالی نصب کریں تاکہ مچھروں کی آمد کم ہو۔
ڈینگی سے بچاؤ آپ کے ہاتھ میں ہے۔ احتیاط کریں اور محفوظ رہیں۔
