آئی پی ایس او ایس کے چیف ایگزیکٹو آفیسر نے وفاقی وزیرِ صحت مصطفی کمال سے ملاقات میں ایچ پی وی ویکسین کے حوالے سے عوامی رویوں اور آگاہی پر تفصیلی بریفنگ دی۔ بریفنگ میں ویکسین کے بارے میں عوامی رائے، آگاہی کی سطح اور مہمات کے اثرات کی صورتِ حال پر بات کی گئی۔اجلاس میں وفاقی سیکریٹری صحت اور ڈی جی ایف ڈی آئی بھی شریک ہوئے اور شرکاء نے بریفنگ کے دوران سروے کے نتائج اور عوامی رجحانات کا جائزہ لیا۔ بریفنگ میں فراہم کردہ اعداد و شمار نے ویکسین کے بارے میں عوامی ادراک میں تبدیلیاں واضح کیں۔بریفنگ میں بتایا گیا کہ وزیرِ صحت کے اپنی بیٹی کو ایچ پی وی ویکسین لگوانے کے عملی اقدام کے بعد عوامی رویے میں نمایاں بہتری آئی ہے۔ مثبت رائے میں اہم اضافہ ہوا جبکہ منفی رجحان میں بیس فیصد کمی دیکھی گئی، جسے شرکاء نے بریفنگ میں نمایاں پیش رفت قرار دیا۔وزیرِ صحت نے آئی پی ایس او ایس کی کاوشوں کو سراہا اور کہا کہ ایسے اقدامات سے نہ صرف آگاہی بڑھتی ہے بلکہ عوام کا اعتماد بھی بحال ہوتا ہے۔ انھوں نے کہا کہ عوام کو شواہد اور سائنسی بنیادوں پر مبنی معلومات فراہم کرنا اولین ترجیح ہے تاکہ ویکسین کے حوالے سے غلط فہمیوں کا خاتمہ ہو۔وزیرِ صحت نے واضح کیا کہ عوام کو بیماریوں اور وباؤں سے بچانے کے لیے مربوط حکمتِ عملی تشکیل دی گئی ہے اور عوامی مہمات کے ذریعے ایچ پی وی ویکسین کی قبولیت میں مزید بہتری لائی جائے گی۔ انھوں نے عوام سے اپیل کی کہ وہ منفی پروپیگنڈہ پر یقین نہ کریں اور احتیاط کو علاج پر ترجیح دیں کیونکہ ہمیں لوگوں کو بیمار ہونے سے بچانا ہے۔اجلاس کے اختتام پر آئی پی ایس او ایس نے سروے کے نتائج کے تناظر میں آئندہ مہمات اور آگاہی پروگرامز کی سفارشات پیش کردیں اور وزیرِ صحت نے اداروں کے باہمی تعاون کی اہمیت پر زور دیتے ہوئے آئندہ اقدامات کی یقین دہانی کروائی۔
آئی پی ایس او ایس کی وزیرِ صحت سے ملاقات
کوئی تبصرہ نہیں ہے۔
