اسلام آباد ہیلتھ کیئر ریگولیٹری اتھارٹی (IHRA) اور انٹرنیشنل لیبر آرگنائزیشن (ILO) کے اشتراک سے اسلام آباد کے نجی ہوٹل میں ایک سیمینار منعقد ہوا جس کا مقصد ہیلتھ کیئر اداروں میں مریضوں کی بہتر دیکھ بھال اور صحت کے شعبے سے وابستہ عملے کے تحفظ کے لیے نئے "کم از کم خدماتی معیارات” پر رہنمائی فراہم کرنا تھا۔ اس تقریب میں اسلام آباد کیپیٹل ٹیریٹری کے ہسپتالوں کے سی ای اوز، میڈیکل ڈائریکٹرز اور سینئر انتظامیہ نے شرکت کی۔
تقریب کا آغاز تلاوتِ قرآن پاک اور قومی ترانے سے ہوا۔ IHRA کے رکن بورڈ پروفیسر ڈاکٹر مطیع الرحمن نے خوش آمدیدی خطاب میں معیاری طبی سہولیات کی اہمیت پر روشنی ڈالی۔ وفاقی وزیر برائے قومی صحت ڈاکٹر ملک مختار احمد بھرت اس موقع پر مہمان خصوصی تھے، جنہوں نے حکومتی سطح پر طبی نظام کی بہتری کے لیے اصلاحات کے عزم کا اظہار کیا۔
سیمینار کے دوران ILO کے کنٹری ڈائریکٹر Geir T. Tonstol، وزارت صحت کے جوائنٹ سیکریٹری سید صلاح الدین احمد اور وزارت سمندر پار پاکستانی و افرادی قوت کے محمد سہیل خواجہ نے اپنی گفتگو میں مختلف اداروں کے درمیان تعاون کی ضرورت پر زور دیا، تاکہ صحت کے شعبے میں معیار کو یقینی بنایا جا سکے۔
پروفیسر ڈاکٹر مطیع الرحمن اور ILO کے ٹیکنیکل کنسلٹنٹ سعید پاشا نے نئے سروس ڈیلیوری معیارات کی تفصیل پر مبنی پریزنٹیشن پیش کی، جس میں ہیلتھ کیئر اداروں کے لیے اپ ڈیٹ شدہ تقاضوں کو واضح کیا گیا۔ شرکاء نے اس موضوع پر سوالات بھی کیے جن کے جوابات دیے گئے۔
اختتامی کلمات میں ہیلتھ سروسز اکیڈمی اسلام آباد کے وائس چانسلر پروفیسر ڈاکٹر شہزاد علی خان نے افرادی قوت کی تربیت اور معیارات پر مسلسل نگرانی کو وقت کی اہم ضرورت قرار دیا۔ اختتام پر IHRA کے چیئرمین ڈاکٹر محمد ریاض شہباز جنجوعہ نے تمام شرکا اور شراکت داروں کی کوششوں کو سراہا۔
یہ سیمینار ریگولیٹری اداروں، صحت کے شعبے کے ماہرین اور بین الاقوامی شرکا کے باہمی رابطے کا اہم ذریعہ ثابت ہوا، جو اسلام آباد کے طبی اداروں میں بہتر خدمات کی فراہمی کے لیے ایک عملی قدم ہے۔
