ہائر ایجوکیشن کمیشن نے امریکی محکمہ خارجہ کے میرٹ اور ضرورت پر مبنی اسکالرشپ پروگرام کے تحت مالیاتی نظم و نسق، آڈٹ طریقہ کار اور خریداری کے مؤثر طریقہ کار پر دو روزہ ورکشاپ کا انعقاد کیا۔ اس ورکشاپ میں پاکستان کے مختلف علاقوں سے یونیورسٹی نمائندوں نے شرکت کی اور انہیں حکومتی مالی ضوابط، آڈٹ پروسیجرز، خریداری کے اصول اور آڈٹنگ میں ڈیٹا اینالیٹکس کے استعمال کے بارے میں آگاہ کیا گیا۔
افتتاحی خطاب میں ایچ ای سی کے مشیر محمد رضا چوہان نے یونیورسٹیوں میں مضبوط مالی نظم و نسق، برانڈ کی تعمیر اور تحقیق کو کمرشلائز کرنے، صنعتی تعاون اور مارکیٹ کی ضروریات سے ہم آہنگ نصاب کے ذریعے آمدنی کے نئے ذرائع پیدا کرنے پر زور دیا۔
ورکشاپ کے دوران اکاؤنٹنٹ جنرل پاکستان ریونیو، پبلک پروکیورمنٹ ریگولیٹری اتھارٹی اور دیگر متعلقہ اداروں کے ماہرین نے شرکت کی اور انہوں نے مالی معاملات میں شفافیت کے لیے جدید آڈٹ اور ٹیکنالوجی کے استعمال پر خصوصی سیشنز کیے۔ شرکاء نے جدید رجحانات کا جائزہ لیتے ہوئے عملی تربیت بھی حاصل کی۔
ورکشاپ کے اختتام پر شرکاء میں اسناد تقسیم کی گئیں اور یونیورسٹیوں کی جانب سے سیکھے گئے اسباق کو ادارہ جاتی شفافیت اور مضبوط نظم و نسق کے لیے بروئے کار لانے کے عزم کا اظہار کیا گیا۔
