غزہ کی نسل کشی عالمی بے حسی بے نقاب

اسلام آباد، 25 ستمبر میں انسٹیٹیوٹ آف پالیسی اسٹڈیز میں منعقدہ سیمینار میں ماہرین نے غزہ میں نسل کشی کو عالمی نظام کی بے حسی اور ناکامی کی روشن مثال قرار دیا اور کہا کہ غزہ میں نسل کشی کو روکنے کے لیے فوری اور مربوط حکمت عملی درکار ہے۔سابق سفیر نائلہ چوہان نے بتایا کہ مسئلے کو درست انداز میں پیش کرنا ضروری ہے تاکہ جامع فہم پیدا ہو اور فلسطینیوں کی صورتحال کی نوعیت واضح ہو سکے۔ انہوں نے کہا کہ اس تنازع کو محض مذہبی یا سیاسی رخ تک محدود نہیں کیا جانا چاہیے بلکہ اس میں تجارتی مفادات کا بھی بڑا کردار ہے، جہاں کاروباری حلقے غزہ کو محض منافع کی زمین سمجھتے ہیں اور اسی سوچ نے فلسطینیوں کو ان کے گھروں سے بے دخل کرنے کی کوششوں کو ہوا دی۔سابق سفیر نصراللہ خان نے کہا کہ اسرائیل کے مظالم کو الفاظ میں بیان کرنا مشکل ہے اور 7 اکتوبر سے قبل بھی فلسطینی غیر انسانی سلوک کا نشانہ تھے مگر بعد ازاں المیہ کئی گنا بڑھا۔ ان کے بقول یہ واقعہ عالمی برادری کی اجتماعی ناکامی کی نمائندہ حیثیت اختیار کر چکا ہے۔بریگیڈیئر ریٹائرڈ سید نذیر نے عالمی اداروں اور طاقتوں کی غفلت کو غزہ میں جاری جارحیت کی ایک بڑی وجہ قرار دیا اور کہا کہ امریکہ اور مغربی ممالک کی یکطرفہ حمایت اور اقوامِ متحدہ جیسی تنظیموں کی عدم کارکردگی نے اسرائیلی کارروائیوں کو تسلسل دیا ہے۔ انہوں نے عرب ممالک کے کمزور ردِعمل پر بھی کڑی تنقید کی اور کہا کہ قطر میں مبینہ مذاکراتی ٹیم کو نشانہ بنانا امن کے قیام میں عدم سنجیدگی کی علامت ہے۔ڈاکٹر اظہر احمد نے کہا کہ صرف واقعات کی گنتی سے آگے جا کر اسرائیلی دعوؤں کی سچائی اور عالمی برادری کے عملی اقدامات کا محتاط تجزیہ کرنا ہوگا تاکہ غزہ میں نسل کشی کو مؤثر انداز میں روکا جا سکے۔ ان کا کہنا تھا کہ وہی حکمت عملی تبدیلی لا سکتی ہے جو دعووں اور کارروائیوں دونوں کا محتاط مشاہدہ کرے۔سابق سفیر سید ابرار حسین نے اظہار خیال کرتے ہوئے کہا کہ اسرائیلی جارحیت نے دنیا میں فلسطینیوں کے حق میں ہمدردی پیدا کی اور دو ریاستی حل کی بحث کو دوبارہ زندہ کیا مگر جنگ بندی کی قراردادیں سیاسی و سفارتی رکاوٹوں کی وجہ سے ویٹو ہو رہی ہیں۔ انہوں نے واضح کیا کہ اسرائیل کا مقصد پورے فلسطین سے فلسطینیوں کو بے دخل کرنا ہے اور اس خطرے کے مدنظر مسلم ممالک کو مشترکہ دفاعی تیاری، وسائل کے اشتراک اور امن برقرار رکھنے والی افواج کے قیام پر فوری غور کرنا چاہیے۔ انہوں نے پاک سعودی اسٹریٹجک دفاعی معاہدے کو ایک قابلِ عمل سکیورٹی ڈھانچے کی بنیاد قرار دیا۔سیمینار کے شرکاء نے متفقہ طور پر زور دیا کہ غزہ میں نسل کشی کی روک تھام کے لیے صرف ملامت اور بیانیے کافی نہیں بلکہ مسلم اتحاد، مشترکہ دفاعی معاہدے، وسائل کی مشترکہ تقسیم اور خطے میں امن قائم رکھنے والی افواج کی تعیناتی جیسی عملی پیش رفت ضروری ہے تاکہ طویل المدتی امن اور انسانی تحفظ کو یقینی بنایا جا سکے۔