برطانوی ہائی کمشنر کی وزیر مملکت سے ملاقات

اسلام آباد، 17 اکتوبر 2025۔ جین میریٹ نے سینئر سرکاری مشیر میٹ کلینسی کے ہمراہ وزارتِ خزانہ میں وزیر مملکت خزانہ و ریلوے بلال اظہر کیانی سے ملاقات کی جس میں برطانیہ اور پاکستان کے تعلقات، اقتصادی تعاون اور میکرو اقتصادی ترقی پر تبادلۂ خیال کیا گیا۔ملاقات میں دوطرفہ شراکت داری کو مضبوط بنانے، تجارتی اور مالیاتی تعاون کے مواقع اور باہمی دلچسپی کے شعبوں میں عملی اقدامات پر تفصیلی گفتگو ہوئی۔ شرکاء نے معاشی پالیسیوں کے ہم آہنگی کے ذریعے استحکام کو ترقی میں بدلنے کے امکانات پر تبادلۂ خیال کیا اور مربوط حکمتِ عملی کی ضرورت پر زور دیا۔وزیر مملکت نے بتایا کہ وزیرِ اعظم شہباز شریف اقتصادی استحکام کو معاشی ترقی میں تبدیل کرنے کے وژن کے تحت اصلاحاتی ایجنڈا اور سرمایہ کاری کی سہولتوں پر توجہ دے رہے ہیں۔ انہوں نے واضح کیا کہ حکومت ریلوے کے نظام کو جدید سہولیات فراہم کرنے اور انفراسٹرکچر کی بہتری کے منصوبوں پر تیزی سے عمل پیرا ہے تاکہ عوامی نقل و حمل کے معیار میں نمایاں بہتری آئے۔برطانوی ہائی کمشنر نے دوطرفہ تعاون میں اضافے کو خوش آئند قرار دیا اور تجارتی، مالیاتی اور انفراسٹرکچر کے شعبوں میں تعاون کے مزید راستے کھولنے پر زور دیا۔ دونوں فریقوں نے پاک برطانیہ تعلقات کو تقویت دینے اور باقاعدہ رابطوں کے ذریعے امور پر پیش رفت جاری رکھنے کے عزم کا اعادہ کیا۔