قومی کمیشن برائے حقوقِ اطفال نے اقوامِ متحدہ کے ترقیاتی پروگرام کے تعاون اور یورپی یونین کی مالی معاونت سے محکمہ محنت و افرادی قوت بلوچستان کے حکام کے لیے ایک خصوصی تربیتی نشست منعقد کی۔ اس تربیت کا مقصد بچوں کی مزدوری کے خلاف مؤثر نگرانی کو تقویت دینا اور محنت معائنہ کاروں کو بچوں کے حساس نقطۂ نظر کے مطابق معائنہ کرنے کے قابل بنانا تھا۔تربیتی نشست میں دستاویزی شواہد کے جمع کرنے، معاملے کی درست تشخیص اور بچوں کی حوالگی کے عمل کو مضبوط بنانے پر زور دیا گیا تاکہ بچے بروقت تحفظ اور بحالی کی خدمات تک پہنچ سکیں۔ تربیت بلوچستان کے مخصوص حالات کو مدِ نظر رکھتے ہوئے ترتیب دی گئی تھی اور خاص طور پر کان کنی، گاڑیوں کی مرمت کی دکانیں، گھریلو کام اور دیگر غیر رسمی شعبوں میں بچوں کی مزدوری کے خطرات پر توجہ مرکوز کی گئی۔شرکاء کو قانونی ضوابط، خطرناک اور غیر خطرناک کام کی نشاندہی، اور دور دراز اور غیر رسمی ماحول میں معائنہ کے عملی طریقہ کار کی تربیت دی گئی۔ محکمہ محنت، سماجی بہبود، حفاظتی اداروں اور ضلعی انتظامیہ کے مابین ہم آہنگی اور حوالہ کاری کے نظام کو بہتر بنانے کے طریقے بھی زیر بحث آئے تاکہ بچوں کی فوری تحفظ اور بحالی ممکن ہو سکے۔بچوں کی مزدوری کے خاتمے کے لیے محنت کے موثر معائنے کاروباری اور انسانی حقوق کے معیارات کے فروغ میں اہم کردار ادا کرتے ہیں اور ملک کی بین الاقوامی تجارتی ذمہ داریوں سے مطابقت کی راہ ہموار کرتے ہیں۔ تربیتی پروگرام کے ذریعے ضلعی سطح پر نفاذ کی صلاحیت میں اضافہ اور رابطوں کو مضبوط کرنے کا عزم ظاہر کیا گیا۔قومی کمیشن برائے حقوقِ اطفال کے نمائندے وکیل عبدالحئی، رکنِ بلوچستان نے کمیشن کی جانب سے مستقل تربیت اور صوبائی حکام کے ساتھ نزدیک تعاون کی یقین دہانی کروائی تاکہ بچوں کی مزدوری کے خاتمے کی طرف عملی پیش رفت ممکن ہو سکے۔
بلوچستان میں بچوں کی مزدوری کی نگرانی کیلئے تربیت
کوئی تبصرہ نہیں ہے۔
