اسلام آباد میں وزارت قومی ورثہ و ثقافت ڈویژن کی پارلیمانی سیکرٹری محترمہ فرح ناز اکبر نے لوک ورثہ میں آزادی فیسٹیول اور "معرکہ حق” کی تقریب میں بطور مہمان خصوصی شرکت کی۔ اس موقع پر روایتی دستکاریوں اور ثقافتی ملبوسات کے اسٹالز نے پاکستان کے ورثے کی بھرپور تنوع کو نمایاں کیا۔ مہمان خصوصی کو سندھ کی روایت کے مطابق اجرک بھی پیش کی گئی، جو عزت اور ثقافتی فخر کی علامت ہے۔
تقریب میں ثقافتی رنگ بھرنے کے لیے بینڈ کی شاندار پرفارمنس، علاقائی رقص اور دلکش سر و سنگیت پیش کیا گیا۔ شام کی خاص بات "معرکہ حق آزادی کانسرٹ” اور معروف فنکار فضل جٹ کی قیادت میں پیش کردہ فوک تھیٹر تھا، جس میں معرکہ حق کے شہداء کو شاندار خراج عقیدت پیش کیا گیا۔
اس موقع پر وطن سے محبت اور ثقافتی اظہار کا خوبصورت امتزاج دیکھنے کو ملا، جس سے حاضرین کو قربانی، آزادی اور قومی یکجہتی کا پیغام ملا۔
