اسلام آباد میں منعقدہ ایک گول میز مباحثے میں کہا گیا کہ افغانستان کو دنیا سے الگ تھلگ کرنا، درحقیقت افغان عوام کو الگ کرنا ہے، جس سے ملک میں دہشت گرد گروہوں کو فعال ہونے کا موقع ملتا ہے۔ ماہرین نے افغانستان سے متعلق بین الاقوامی پالیسیوں پر نظرثانی اور افغان عوام کے ساتھ براہ راست رابطے کی ضرورت پر زور دیا۔
معروف مصنفہ اور ایسوسی ایٹڈ پریس کی سابق ڈائریکٹر برائے افغانستان و پاکستان، کیتھی گینن نے گفتگو کرتے ہوئے کہا کہ طالبان انتظامیہ کو صرف الٹی میٹم دینا کارگر نہیں ہوگا۔ انہوں نے مختلف اسٹیک ہولڈرز بشمول طالبان حکومت سے بات چیت کی اہمیت اجاگر کی اور کہا کہ مغربی ممالک، افغانستان میں زمینی حقائق کا براہ راست مشاہدہ کیے بغیر گمراہ کن نتائج اخذ کر رہے ہیں۔ کیتھی گینن نے اپنی حالیہ افغانستان یاترا کا حوالہ دیتے ہوئے بتایا کہ وہاں خواتین پر تعلیم اور نقل و حرکت کی پابندیوں کے باوجود وہ کئی خواتین کو عوامی مقامات پر اور بلا کسی مرد محرم کے کام کرتے ہوئے دیکھ چکی ہیں۔ انہوں نے افغانستان میں سکیورٹی صورتحال میں قدرے بہتری اور کرپشن میں کمی کو مثبت قرار دیا اور کہا کہ ملک پوری طرح فعال نہیں تو، پھر بھی اپنی جگہ کام کر رہا ہے۔
سینٹر فار ریسرچ اینڈ سیکیورٹی اسٹڈیز کے ایگزیکٹو ڈائریکٹر امتیاز گل نے افغان سرزمین سے پیدا ہونے والی دہشت گردی سے نمٹنے کے لیے ایک ہمہ جہت، علاقائی اور کثیر الجہتی حکمت عملی کی ضرورت پر زور دیا۔ انہوں نے طالبان حکومت کے علاقائی و عالمی سطح پر روابط بڑھانے کی خواہش کو سراہتے ہوئے کہا کہ اسلامی اماراتِ افغانستان کو ہمسایہ ممالک کی تشویشات بھی دور کرنی چاہئیں۔
سابق پاکستانی سفیر اشرف جہانگیر قاضی نے افغانستان کے لیے قلیل مدتی اور محض سیکیورٹی کے تناظر سے خارجہ پالیسی اپنانے کے بجائے ایک طویل مدتی، عملی اور وسیع تر حکمت عملی کی وکالت کی۔ ان کا کہنا تھا کہ افغان عوام ہی اپنے مسائل کا حل سب سے بہتر نکال سکتے ہیں۔
انسٹی ٹیوٹ آف ریجنل اسٹڈیز کے صدر، سفیر جوہر سلیم نے مغربی بیانیے اور مقررین کے دلائل کے درمیان فرق واضح کیا۔ انہوں نے کہا کہ مغربی نقطہ نظر زیادہ تر حکمرانی میں خامیوں، بنیادی آزادیوں کی کمی اور افغانستان سے آنے والے سیکورٹی خطرات پر مبنی ہے جو علیحدگی کی پالیسی کی حمایت کرتا ہے، جبکہ آج کے مقررین نے متوازن تعاون اور مثبت روابط کی ضرورت پر زور دیا۔ انہوں نے کہا کہ پاکستان ہمیشہ افغان قیادت اور افغان سرزمین پر مبنی حل کا حامی رہا ہے اور اپنے اہم ہمسایہ ملک کے ساتھ تجارت اور روابط کو فروغ دینے کے لیے پرعزم ہے۔ انہوں نے مزید کہا کہ پاکستان توقع کرتا ہے کہ افغانستان اپنی سرزمین کسی دہشت گرد تنظیم کو پاکستان کے خلاف استعمال کرنے کی اجازت نہیں دے گا۔ ان کا کہنا تھا کہ باہمی احترام اور اعتماد ہی دونوں ہمسایہ ممالک کے درمیان پائیدار اور باہمی مفید معاشی شراکت داری کی بنیاد بن سکتا ہے، جو پورے خطے کے لیے فائدے کا باعث ہوگی۔
