ڈاکٹر محمد افضل بابر نے ہائی وے زون کے تیرہویں انتخابات کی تقریب سے خطاب میں کہا کہ پرائیویٹ اسکولز نیٹ ورک ایک قومی تعلیمی جمہوری تحریک ہے جو تین دہائی سے کم آمدنی والے نجی تعلیمی اداروں کی واحد نمائندہ فورم کے طور پر کام کر رہی ہے۔ انہوں نے مرکزی سیکرٹریٹ کے ہائی وے زون میں واقع ہونے کو باعثِ اعزاز قرار دیتے ہوئے کہا کہ اس زون کو دیگر تمام زونز کے لیے ماڈل بنایا جانا چاہیے۔بانی و صدر نے بتایا کہ تنظیم نے ملک بھر میں تین نیشنل گول میز کانفرنسیں منعقد کر کے شعبہ کی ترقی اور بہتری میں موثر کردار ادا کیا ہے اور اب وہ متعلقہ سرکاری اداروں کے ساتھ مسائل کے حل کے لیے فعال رابطے برقرار رکھے گی۔ انہوں نے متعلقہ محکمہ جات جیسے پیرا، وفاقی تعلیمی بورڈ اور وفاقی نظامتِ تعلیمات کے ساتھ معاملات کے حل کا عندیہ بھی دیا تاکہ کم آمدنی والے نجی اسکولوں کے مسائل بہتر انداز میں حل ہوں۔تقریب میں مرکزی جنرل سیکرٹری مقبول حسین ڈار نے استقبالیہ کلمات کہے اور بتایا کہ ہائی وے زون کو دو انتظامی ذیلی زونز میں تقسیم کیا گیا ہے تاکہ گراس روٹ سطح پر مربوط رابطہ کاری کا نظام قائم کیا جا سکے اور مقامی سطح پر مسائل کے فوری ازالے کی راہ ہموار ہو۔انتخابی عمل کی نگرانی کرتے ہوئے مرکزی نائب صدر و انتخابی کمشنر حاجی عبدالندیم مغل نے اوپن رائے شماری کے تحت انتخابات کروائے۔ اس کے مطابق محمود حسین رفیع ہائی وے زون کے صدر بلا مقابلہ منتخب ہوئے جبکہ سید سجاد حسین جنرل سیکرٹری منتخب قرار پائے۔ دیگر منتخب عہدیداروں میں نائب صدر عامر شہزاد، نائب صدر خاتون میمونہ شفیق، فنانس سیکرٹری طیب شہزاد، اسپورٹس سیکرٹری عدیل عباسی، انفارمیشن سیکرٹری ڈاکٹر نعمان سعید، سیکرٹری ہم نصابی سرگرمیاں سدرۃالمنتہی، کوآرڈینیٹر نئی آبادی اظہر رسول، کوآرڈینیٹر اقبال ٹاؤن مدثر اقبال اور کوآرڈینیٹر ضیاء مسجد محمد رضوان شامل ہیں۔مقبول حسین ڈار نے تمام نو منتخب زونل عہدیداران سے حلف لیا اور زور دیا کہ پرائیویٹ اسکولز نیٹ ورک کی یہ قیادت ہائی وے زون کو ایک رہنما نمونہ بنانے اور کم وسائل والے اسکولوں کے مسائل کے حل میں عملی اقدامات کرے گی۔ انہوں نے مقامی سطح پر رابطے مضبوط کرنے اور والدین و اساتذہ کے ساتھ اشتراک بڑھانے پر بھی تاکید کی۔
پرائیویٹ اسکولز نیٹ ورک کا ہائی وے زون میں عہدہ سنبھالنا
کوئی تبصرہ نہیں ہے۔
