قومی اسمبلی سیکرٹریٹ
ڈائریکٹوریٹ جنرل آف میڈیا
پریس ریلیز
اسلام آباد: 18 ستمبر 2025ء
نوجوان پارلیمنٹرین فورم (YPF) پاکستان کی صدر، سیدہ نوشین افتخار، رکن قومی اسمبلی، نے آج پارلیمنٹ ہاؤس اسلام آباد میں جمہوریہ مالدیپ کی پیپلز مجلس کے پارلیمانی وفد کا بھرپور خیرمقدم کیا۔ ملاقات میں پاکستان اور مالدیپ کے تاریخی اور دوستانہ تعلقات پر زور دیا گیا اور نوجوانوں کے تعاون اور پارلیمانی روابط کو مضبوط بنانے پر تبادلہ خیال کیا گیا۔
وفد نے نوجوانوں کو دونوں ممالک کے مستقبل کے کلیدی شراکت دار تسلیم کرتے ہوئے مباحثوں میں فعال شرکت کی۔ یوتھ فورم کی صدر نے نوجوانوں کو بااختیار بنانے کے لیے تعلیم، ہنر مندی کی تربیت اور شہری شمولیت میں سرمایہ کاری کی ضرورت پر زور دیا۔
تعاون کے کئی اقدامات کی تجاویز پیش کی گئیں، جن میں پاکستان اور مالدیپ کے درمیان نوجوان پارلیمنٹری مکالمے (Pakistan–Maldives Youth Parliamentary Dialogue) کا قیام شامل ہے تاکہ خیالات کا تبادلہ اور نوجوان بے روزگاری، تعلیمی اصلاحات، موسمیاتی اقدامات اور ڈیجیٹل جدت جیسے مشترکہ چیلنجز پر بات چیت ممکن ہو۔ دیگر تجاویز میں پاکستان ٹیکنیکل اسسٹنس پروگرام (PTAP) کے تحت اسکالرشپ میں توسیع، مشترکہ تربیتی ورکشاپس اور نوجوانوں کے تبادلہ پروگرام شامل ہیں۔
مالدیپ کو موسمیاتی تبدیلی کے سامنے فرنٹ لائن ملک تسلیم کرتے ہوئے دونوں فریقین نے موسمی سفارت کاری میں نوجوانوں کے کردار کو مضبوط کرنے پر اتفاق کیا، خاص طور پر پائیدار سیاحت، قابلِ تجدید توانائی اور ماحولیاتی تحفظ کے شعبوں میں تعاون کو فروغ دینے پر زور دیا گیا۔
ملاقات کا ایک اہم نتیجہ یہ بھی رہا کہ وفد نے مالدیپ میں نوجوان پارلیمنٹرین فورم کے قیام کی حمایت اور اس میں تعاون کا عندیہ دیا۔ اس اقدام سے مالدیپ کے نوجوان قانون سازوں کو پالیسی سازی میں فعال شمولیت اور پاکستانی ہم منصبوں کے ساتھ تعلقات کو مستحکم کرنے کے لیے ایک باقاعدہ پلیٹ فارم میسر آئے گا۔
یوتھ فورم کی صدر سیدہ نوشین افتخار اور پاک-مالدیپ پارلیمانی فرینڈشپ گروپ کی کنوینر محترمہ شائستہ خان نے اس شراکت داری سے دوستی، نوجوانوں کے بااختیار بنانے اور پارلیمانی تعاون کے نئے مواقع کھلنے کے بارے میں اطمینان اور امید کا اظہار کیا۔
