انفارمیشن ٹیکنالوجی یونیورسٹی میں الائنس فرانسیز لاہور اور کیمپس فرانس کے نمائندوں کے درمیان ایک تعمیری ملاقات میں مستقبل میں تعلیمی اور تحقیقی تعاون کے فروغ کے امکانات پر بات چیت کی گئی۔
ملاقات میں الائنس فرانسیز لاہور کے ڈائریکٹر فبریس ڈِسڈیئیر اور کیمپس فرانس (لاہور) کے منیجر حمزہ خٹک شریک تھے۔ یونیورسٹی کی جانب سے رجسٹرار جناب عدیل اصغر اور پروگرام مینیجر برائے ایڈوانسمنٹ اینڈ ایکسٹیرنل لنکیجز سید یاسر عباس نے شرکت کی اور گفتگو میں حصہ لیا۔
شرکاء نے دوطرفہ شراکت داری کے دائرہ کار، تعلیمی تبادلوں، مشترکہ ورکشاپس اور تحقیقی منصوبوں کے فروغ سمیت آئندہ تعاون کے ممکنہ شعبوں پر تفصیلی تبادلہ خیال کیا۔ ملاقات میں عملی اقدامات اور مشترکہ پروگرامز کے نفاذ کے حوالے سے باہمی مفاہمت کو فروغ دینے پر زور دیا گیا۔
دونوں اداروں نے قریبی رابطے جاری رکھنے اور آئندہ مشترکہ سرگرمیوں کے اجرا کے لیے تعاون کرنے کے عزم کا اظہار کیا، جبکہ امید ظاہر کی گئی کہ یہ شراکت داری مقامی تعلیمی اور تحقیقی صلاحیتوں کو مضبوط بنانے میں مددگار ثابت ہوگی۔
