اسلام آباد وائلڈ لائف مینجمنٹ بورڈ نے انسٹی ٹیوٹ آف رورل مینجمنٹ اور سی ڈی اے کے اشتراک سے مارگلہ ہلز نیشنل پارک کے ٹریل 7 پر مقامی درختوں کی شجرکاری مہم کا انعقاد کیا۔ اس اقدام کا مقصد نہ صرف درخت لگا کر ماحول کو سرسبز بنانا ہے بلکہ بیٹیوں کی اہمیت کو بھی اجاگر کرنا ہے۔
شجرکاری مہم "ایک بیٹی، ایک شجر” کے عنوان سے منعقد کی گئی، جس کا مقصد معاشرے میں بیٹیوں کے مقام کو اُجاگر کرنا اور لوگوں میں ماحول دوست سوچ کو فروغ دینا ہے۔ اس موقع پر سول سوسائٹی کے اراکین سمیت متعدد افراد نے شرکت کی اور شجرکاری میں بڑھ چڑھ کر حصہ لیا۔
منتظمین کے مطابق اس طرح کے اقدامات نہ صرف شہر کو سرسبز بنانے میں مددگار ثابت ہوں گے بلکہ ماحول کے تحفظ اور مستقبل کو پائیدار بنانے کی جانب اہم قدم ہے۔ اسلام آباد وائلڈ لائف مینجمنٹ بورڈ نے شجرکاری مہم میں حصہ لینے والے تمام شرکاء اور سول سوسائٹی کے اراکین کا شکریہ ادا کیا اور امید ظاہر کی کہ اسی جذبے کے ساتھ آئندہ بھی ایسے اقدامات جاری رہیں گے۔
