کیلیفورنیا سے موصولہ اطلاعات کے مطابق گوگل نے اپنے جی میل صارفین کو خبردار کیا ہے کہ ایک خطرناک ہیکرز گروپ نے بڑے ڈیٹا بیس تک رسائی حاصل کرنے کے بعد اکاؤنٹ ہولڈرز کو نشانہ بنانا شروع کر دیا ہے۔ اس ہیکنگ کے بعد گوگل کے صارفین مزید حملوں کا آسان ہدف بن گئے ہیں۔
رپورٹس کے مطابق یہ سائبر حملے سیلز فورس کے کلاؤڈ پلیٹ فارم میں دراندازی کے بعد سامنے آئے ہیں، جس کے نتیجے میں گوگل کی سروسز استعمال کرنے والے افراد مزید خطرے میں پڑ گئے ہیں۔ جی میل اور گوگل کلاؤڈ پر تقریباً ڈھائی ارب صارفین انحصار کرتے ہیں، جنہیں کمپنی نے تلقین کی ہے کہ وہ اپنی سائبر سکیورٹی بڑھائیں اور کسی بھی مشکوک سرگرمی پر کڑی نظر رکھیں۔
گوگل کے تھریٹ انٹیلی جنس گروپ نے اس سال جون میں ان سائبر حملوں کے بارے میں پہلی بار آگاہ کیا تھا، جبکہ کمپنی نے بعد ازاں اس بات کی تصدیق کی کہ پاسورڈز کے افشا ہونے کی وجہ سے حملہ آور متعدد اکاؤنٹس تک رسائی حاصل کرنے میں کامیاب ہو گئے ہیں۔ ماہرین نے صارفین کو مشورہ دیا ہے کہ وہ اپنے اکاؤنٹس کی حفاظت کے لیے حفاظتی اقدامات کو مزید مظبوط بنائیں۔
