اسلامی تعاون تنظیم کی قائمہ کمیٹی برائے سائنس و ٹیکنالوجی (کامسٹیک) اور چین کی ننگبو یونیورسٹی کے اشتراک سے بایومیڈیکل آرٹیفیشل انٹیلی جنس پر 19 روزہ تربیتی سرٹیفکیٹ کورس کامیابی کے ساتھ اختتام پذیر ہوگیا۔ اس کورس میں 35 او آئی سی رکن ممالک سمیت دنیا بھر کے 350 سے زائد شرکاء نے شرکت کی، جنہیں جدید بایومیڈیکل اے آئی کی تھیوری اور عملی اطلاقات سے روشناس کرایا گیا۔
اختتامی تقریب سے خطاب کرتے ہوئے کامسٹیک کے کوآرڈینیٹر جنرل، پروفیسر ڈاکٹر محمد اقبال چوہدری نے ننگبو یونیورسٹی کے نامور اساتذہ اور ماہرین کا خصوصی شکریہ ادا کیا۔ انہوں نے کہا کہ اس کورس میں نوجوان سائنس دانوں اور محققین کی بھرپور شرکت اور دلچسپی نے اس پروگرام کو کامیاب بنایا۔ پروفیسر چوہدری نے شرکاء کے جذبے اور انتھک محنت کو سراہتے ہوئے امید ظاہر کی کہ اس سائنس و ٹیکنالوجی کورس سے حاصل کردہ معلومات ان کے پیشہ ورانہ سفر میں اہم کردار ادا کریں گی۔
ڈاکٹر شاہد محمود، ایڈوائزر کامسٹیک نے بھی ننگبو یونیورسٹی کے ماہرین کے تعاون اور تربیتی لیکچرز کو سراہا۔ ان کا کہنا تھا کہ یہ کورس نہ صرف نظریاتی لحاظ سے گہرا ثابت ہوا بلکہ عملی تربیت کے اعتبار سے بھی شرکاء کے لیے انتہائی مفید رہا۔ انہوں نے کہا کہ اس پروگرام کے ذریعے نوجوان ریسرچرز مستقبل میں بایومیڈیکل آرٹیفیشل انٹیلی جنس کے شعبے میں نمایاں عملی کردار ادا کرنے کے قابل ہوں گے۔
کورس میں شریک راولپنڈی ویمن یونیورسٹی کی فیکلٹی ممبر ڈاکٹر ہدیٰ سرور نے اپنے تاثرات میں کہا کہ پروگرام کی ساخت شاندار اور بھرپور معلوماتی تھی۔ انہوں نے بتایا کہ لیکچرز کے دوران انہوں نے ورڈ ایمبیڈنگ ٹیکنیکس، بایومالی کیول انکوڈنگ اور سی این اینز کی مدد سے بایومیڈیکل ڈیٹا کا تجزیہ جیسے قیمتی علم حاصل کیا ہے، جو مستقبل کی تحقیق میں ان کے لیے بہت فائدہ مند ثابت ہوگا۔
اس پروگرام میں شریک حاضرین کو اختتامی تقریب کے دوران اسناد دی گئیں، جبکہ آن لائن شرکاء کو ڈیجیٹل سرٹیفکیٹس جاری کیے گئے۔ کورس میں ننگبو یونیورسٹی اور کامسٹیک کے معروف ماہرین و سائنسدانوں نے لیکچرز اور تربیتی سیشنز میں اپنا علم منتقل کیا۔ اس اقدام سے مسلم دنیا میں بایومیڈیکل آرٹیفیشل انٹیلی جنس میں طویل المدت تعاون اور جدت کی راہیں مزید ہموار ہوں گی۔
