عالمی ادارہ صحت (ڈبلیو ایچ او) اور اس کے شراکت دار پولیو کے خاتمے کے لیے پاکستان میں ایک نئی مہم کی تیاری مکمل کر رہے ہیں۔ اس مہم کا مقصد ملک کے 99 اضلاع میں 2 کروڑ 80 لاکھ بچوں کو پولیو جیسی معذورکن بیماری سے تحفظ فراہم کرنا ہے۔
ڈبلیو ایچ او پاکستان کی جانب سے جاری بیان کے مطابق یہ ادارہ حکومت پاکستان اور دیگر شراکت داروں کے ساتھ مل کر پولیو ویکسینیشن مہم کی موثر نگرانی اور عمل درآمد میں مدد کرے گا۔ اس مہم کے دوران متعلقہ افسران اور طبی ٹیمیں گھروں میں جا کر بچوں کو پولیو سے بچاؤ کی خوراک فراہم کریں گی۔
حکام کا کہنا ہے کہ پولیو ایک عالمی اور علاقائی خطرہ ہے جس سے نمٹنے کے لیے ویکسینیشن مہمات کا تسلسل نہایت ضروری ہے۔ والدین سے اپیل کی گئی ہے کہ وہ اپنے پانچ سال تک کی عمر کے بچوں کو لازمی طور پر پولیو کے قطرے پلوا کر اس موذی مرض سے محفوظ بنائیں۔
پولیو کے مکمل خاتمے کے لیے حکومت اور عالمی ادارے بھرپور اقدامات کر رہے ہیں، تاکہ آئندہ نسلوں کو معذوری سے بچایا جا سکے۔
