پاکستان اور چین کے مابین دیرینہ اور قابلِ فخر دوستی کو ایک نئی جہت دینے کے لیے ادارۂ فروغِ قومی زبان، اسلام آباد اور کمیو نیکیشن یونیورسٹی آف چائنا، بیجنگ کے اشتراک سے خطاطی کی نمائشی تقریب منعقد کی گئی، جس میں دونوں ممالک کے مضبوط تعلقات کو بھرپور انداز میں اجاگر کیا گیا۔ تقریب میں حکومت اور تعلیمی حلقوں کے نمایاں افراد نے شرکت کی اور اس بات پر زور دیا گیا کہ پاکستان اور چین کی مثالی دوستی خطے میں امن، ترقی اور خوشحالی کی روشن ضمانت ہے۔
تقریب کا آغاز پاکستان اور چین کے قومی ترانوں اور تلاوت قرآن کریم سے ہوا۔ وفاقی وزیر برائے قومی ورثہ و ثقافت ڈویژن، اورنگ زیب خان کھچی نے صدارت کرتے ہوئے کہا کہ پاکستان اور چین کی دوستی ہر مشکل وقت میں مضبوط رہی ہے اور اس طرح کی تقریبات عوامی اور ثقافتی سطح پر تعاون کو مزید گہرا کرتی ہیں۔ انہوں نے اس سلسلے میں منعقدہ خطاطی کی نمائش کا افتتاح بھی کیا۔
تقریب کے دوران پروفیسر ڈاکٹر لی ہاؤلیی اینگ، ڈین کمیونیکیشن یونیورسٹی آف چائنا نے خصوصی پیغام میں کہا کہ چینی یونیورسٹیاں پاکستانی تعلیمی اداروں کے ساتھ تعلیمی تعاون کو وسعت دینے کے لیے پُرعزم ہیں۔ انہوں نے کہا کہ خطاطی اور فنون لطیفہ کے تبادلے سے دونوں ممالک کے نوجوان اور فنکار قریب آئیں گے اور یہ تبدیلی دوستی کو آنے والی نسلوں تک پہنچائے گی۔
چین کے سفارتخانے کے سیاسی و پریس کونسلر وانگ شانگ جی نے خطاب میں کہا کہ پاکستان اور چین کی دوستی خطے میں پرامن تعاون اور ترقی کی مثالی بنیاد ہے اور اس قسم کی تقریبات سے دوطرفہ روابط کو مزید تقویت ملے گی۔ اس موقع پر ڈاکٹر عابد سیال، جو چین میں اردو کی ترویج میں مصروف رہے ہیں، نے بھی تقریب کو سراہا اور کہا کہ ثقافتی اور تعلیمی سرگرمیوں سے دونوں ممالک کو ایک دوسرے کے مزید قریب آنے کا موقع ملتا ہے۔
تقریب میں ادارۂ فروغِ قومی زبان کے تربیت یافتہ طلبہ کے خطاطی کے فن پارے بھی پیش کیے گئے، جن میں دونوں ممالک کی دوستی کو رنگوں اور حروف کے ذریعے انتہائی خوبصورتی سے اجاگر کیا گیا۔ اس موقع پر وفاقی وزیر، ڈائریکٹر جنرل اور ایگزیکٹو ڈائریکٹر نے وزیر اعظم پاکستان کی خصوصی ہدایت کے تحت شجر کاری مہم کا بھی آغاز کیا۔ تقریب کے آخر میں مرکزی شرکاء اور مہمانان گرامی کے ساتھ یادگاری گروپ فوٹو بھی بنایا گیا۔
مقررین نے اس بات پر زور دیا کہ ثقافتی، تعلیمی اور فنی تعاون پاکستان اور چین کی دوستی کو آنے والے وقت میں نئی بلندیوں تک لے جائے گا۔ تقریب کے اختتام پر پروفیسر ڈاکٹر محمد سلیم مظہر سمیت دیگر منتظمین نے مہمانوں کا شکریہ ادا کیا اور دونوں ملکوں کے درمیان دوستی کے فروغ کے لیے ایسی مزید تقریبات کے انعقاد پر زور دیا۔
