پنجاب ہائر ایجوکیشن کمیشن کے اشتراک سے سول سروسز اکیڈمی میں وائس چانسلرز کے لیے "تبدیلی لانے والی قیادت اور سٹریٹیجک مینجمنٹ پروگرام” کا انعقاد جاری ہے، جس کا مقصد تعلیمی رہنماؤں کو مؤثر قیادت اور بہتر انتظامی حکمت عملیوں سے ہم آہنگ کرنا ہے۔
اس پروگرام کے تحت وائس چانسلرز کو جدید قیادت کے اصول، ٹیم ورک، فیصلہ سازی اور انتظامی اقدامات سے متعلق تربیت دی جا رہی ہے تاکہ وہ اپنی جامعات میں تعلیمی معیار کو بہتر بنانے کے ساتھ ساتھ عملی مسائل کا حل بھی پیش کر سکیں۔ پروگرام میں تجربہ کار ماہرین اور ٹرینرز شرکاء کو رہنمائی فراہم کر رہے ہیں، جس سے نہ صرف ان کی قائدانہ صلاحیتوں میں اضافہ ہو گا بلکہ تعلیمی نظام میں بھی بہتری آئے گی۔
پنجاب ہائر ایجوکیشن کمیشن کی جانب سے ایسے تربیتی پروگرام تعلیمی اداروں میں بہترین انتظام و انصرام اور ترقی کے فروغ کے لیے وقت کی ضرورت قرار دیے جا رہے ہیں۔ سول سروسز اکیڈمی اور کمیشن کی مشترکہ کوششوں سے وائس چانسلرز کو اپنی ذمہ داریاں مؤثر انداز میں ادا کرنے اور خود کو بدلتے ہوئے تعلیمی تقاضوں کے مطابق ڈھالنے میں مدد مل رہی ہے۔
