اسلام آباد میں قومی اسمبلی کی قائمہ کمیٹی برائے خارجہ امور کا اجلاس منعقد ہوا جس میں خطے کے وسطی ایشیائی ممالک کے ساتھ تجارت اور روابط کو فروغ دینے کے لیے جاری اقدامات کا جائزہ لیا گیا۔ اجلاس کی صدارت چیئرپرسن حنا ربانی کھر نے کی جس میں کمیٹی اراکین نے مختلف اہم امور پر تبادلہ خیال کیا۔
اجلاس میں ریلوے کی وزارت نے کمیٹی کو پاکستان، افغانستان اور ازبکستان کے درمیان ریلوے منصوبے کے لیے مشترکہ فزیبلٹی اسٹڈی پر فریم ورک معاہدے سے آگاہ کیا۔ وزارت مواصلات نے کمیٹی کو ازبکستان، آذربائیجان اور قازقستان کے ساتھ نئی لاجسٹکس تعاون اور تجارت و ٹرانزٹ کے فروغ کے لیے اٹھائے گئے دیگر اقدامات پر بریفنگ دی۔ کمیٹی نے اس بات پر زور دیا کہ ایسے منصوبوں کو ترجیح دی جائے جو حقیقت پسندانہ اور قابل عمل ہوں، اور متعلقہ اداروں کو ہدایت کی کہ ایسے منصوبوں کی جامع بریفنگ دی جائے۔ مزید یہ سفارش بھی کی گئی کہ ہر علاقائی ربط سازی منصوبے کے لیے واضح ٹائم لائن اور ہر روٹ کی افادیت کی جانچ بھی فراہم کی جائے۔
کمیٹی نے وزارت خارجہ کی اعلیٰ سطحی سفارتی سرگرمیوں سے متعلق بریفنگ کا جائزہ لیتے ہوئے ہدایت کی کہ آئندہ صرف پروگرام یا شیڈول نہیں بلکہ ان سرگرمیوں کی نمایاں کامیابیوں اور مستقبل کی حکمت عملی سے بھی کمیٹی کو آگاہ کیا جائے۔ چیئرپرسن اور اراکین نے امید ظاہر کی کہ آئندہ اجلاس میں متعلقہ وزارتی نمائندے زیادہ مؤثر انداز میں رپورٹ اور تیاری کے ساتھ موجود ہوں گے۔
