ٹیٹ اینڈ لائل کے زیر اہتمام پی ایس ایف ایس ٹی گلف چیپٹر کی ایک خوبصورت تقریب منعقد ہوئی جس میں علاقائی فوڈ انڈسٹری کے 30 سے زائد ماہرین نے شرکت کی۔ اس اجتماع کا مقصد ماہرین کو ایک دوسرے کے ساتھ تعلقات مضبوط بنانے، علم کے تبادلے اور باہمی تعاون کے فروغ کے لیے ایک پلیٹ فارم مہیا کرنا تھا۔
تقریب کا آغاز تلاوت کلام پاک سے ہوا، جس کے بعد معروف شخصیت طارق سرور اعوان مرحوم کے لیے دعائے مغفرت کی گئی۔ اس موقع پر شاہد حفیظ خان نے کلیدی خطاب کیا اور مختلف کاروباری شراکت داروں سے رابطے کی اہمیت پر روشنی ڈالی۔ انہوں نے زور دیا کہ مختلف شعبوں کے ماہرین کو مل جل کر آگے بڑھنا چاہیے تاکہ انڈسٹری کو جدید خطوط پر استوار کیا جا سکے۔
مہمانوں نے ادارے کے ٹیکنیکل سینٹر کا دورہ کیا، جہاں انہیں ٹیٹ اینڈ لائل کی جدید اختراعات اور ان کے عملی اطلاق کے بارے میں آگاہ کیا گیا۔ اس موقع پر شرکاء نے باہمی گفتگو اور نیٹ ورکنگ کے ذریعے ایک دوسرے کے تجربات سے استفادہ کیا اور اس بات کا عزم کیا کہ آگے بھی علم و تجربے کا تبادلہ جاری رکھا جائے گا۔
تقریب میں پی ایس ایف ایس ٹی کی رکنیت سازی کو فروغ دینے اور ایک دوسرے سے سیکھنے کے عمل کو جاری رکھنے پر زور دیا گیا۔ یہ یادگار شام گلف چیپٹر کے ارکان کے درمیان ہم آہنگی اور مضبوطی کا باعث بنی۔
