پاکستان کے اولین ڈیجیٹل میڈیا پلیٹ فارم "دی گلف آبزرور” نے خبروں کی بین الاقوامی رسائی کو مزید بہتر بنانے کے لیے اپنی ویب سائٹ پر رومانیائی زبان کا آپشن متعارف کروا دیا ہے۔ اس اقدام کا مقصد خصوصاً رومانیہ، مالدووا، پاکستان اور دیگر ممالک میں مقیم رومانوی زبان بولنے والوں کے لیے بہتر اور آسان معلومات کی فراہمی یقینی بنانا ہے۔
رومانیائی زبان کے سیکشن کا باقاعدہ افتتاح پاکستان میں رومانیہ کے سفیر جناب ڈین اسٹوینیسکو نے اسلام آباد میں واقع رومانیہ کے سفارت خانے میں ایک خصوصی تقریب کے دوران کیا۔ اس موقع پر انہوں نے دی گلف آبزرور کی جانب سے رومانوی زبان کی شمولیت کو معلوماتی ذرائع تک رسائی کے فروغ کا اہم ذریعہ قرار دیا اور کہا کہ زبانیں ملکوں کے مابین معاشی اور ثقافتی روابط کو مضبوط بنانے میں کلیدی کردار ادا کرتی ہیں۔
تقریب میں نمایاں شخصیات نے شرکت کی جن میں دی گلف آبزرور کے مالک اور امور خارجہ کے ماہر محمد علی پاشا، دی یورپ ٹوڈے کے ایڈیٹر ان چیف خالد تیمور اکرم، دی گلف آبزرور کی ایڈیٹر ان چیف فاطمہ تز زہرہ، دی یورپ ٹوڈے کے منیجنگ ایڈیٹر ملک محمد شفیق اور ہم نیوز کے سینئر صحافی و سیاسی تجزیہ کار حماد حسن شامل تھے۔
جناب ڈین اسٹوینیسکو نے اپنی گفتگو میں کہا کہ پاکستان میں رومانوی زبان میں خبروں کی فراہمی محض میڈیا کے میدان میں ایک اہم سنگ میل نہیں، بلکہ یہ رومانیہ کے عوام کے لیے پاکستان، جنوبی ایشیا اور اس کی رنگا رنگ ثقافتوں کو بہتر انداز میں جاننے کا ذریعہ بھی فراہم کرتی ہے۔ انہوں نے کہا کہ درست معلومات، ثقافتی تبادلہ اور باہمی نقطہ نظر کے ذریعے دونوں ممالک دوستی کے پل قائم کر سکتے ہیں اور تعلیم، سفارت کاری، تجارت و سیاحت سمیت کئی شعبوں میں تعاون کے نئے مواقع تخلیق کیے جا سکتے ہیں۔
رومانیائی زبان میں خبروں تک براہ راست رسائی کے لیے دی گلف آبزرور کی ویب سائٹ https://thegulfobserver.com وزٹ کریں اور دائیں جانب موجود رومانیہ کے جھنڈے پر کلک کریں۔
