اسپیکر قومی اسمبلی سردار ایاز صادق نے یومِ شجرکاری کے موقع پر پیغام دیتے ہوئے کہا ہے کہ شجرکاری کو قومی فریضہ سمجھ کر اپنانا ناگزیر ہو چکا ہے اور آنے والی نسلوں کو صاف اور صحت مند ماحول فراہم کرنا ہم سب کی مشترکہ ذمہ داری ہے۔
انہوں نے خبردار کیا کہ جنگلات کی بے دریغ کٹائی کے باعث بارشوں، سیلاب اور فضائی آلودگی میں اضافہ ہو رہا ہے، جس سے موسمیاتی تبدیلی کے خطرات میں اضافہ ہو سکتا ہے۔ اسپیکر کا کہنا تھا کہ موسمیاتی تغیرات پر قابو پانے کے لیے فوری اور مؤثر اقدامات کی ضرورت ہے۔
سردار ایاز صادق نے مزید کہا کہ جنگلات نہ صرف فضائی آلودگی کو کم کرتے ہیں بلکہ پانی کو جذب کر کے فلیش فلڈز اور سیلاب کی روک تھام میں بھی اہم کردار ادا کرتے ہیں۔ انہوں نے بتایا کہ درخت ماحولیاتی توازن کو برقرار رکھنے اور زمین کے حسن کو بڑھانے کے ضامن ہیں، جبکہ جنگلات لینڈ سلائیڈنگ اور قحط کے خدشات سے بھی ملک کو محفوظ بناتے ہیں۔
اسپیکر قومی اسمبلی نے شجرکاری کو مستقل قومی تحریک بنانے پر زور دیا اور کہا کہ پاکستان کو سرسبز و شاداب بنانے کے لیے عوام اور حکومت کو یکساں عزم کے ساتھ آگے بڑھنا ہوگا۔ انہوں نے تجویز دی کہ اسکولوں اور شہروں میں بڑے پیمانے پر شجرکاری مہمات شروع کی جائیں۔ ان کا کہنا تھا کہ صرف پودے لگا دینا کافی نہیں بلکہ ان کی مناسب نگہداشت بھی نہایت ضروری ہے۔
سردار ایاز صادق نے تمام افراد پر زور دیا کہ وہ پائیدار ترقی کے لیے شجرکاری مہمات میں بھرپور حصہ لیں تاکہ وطن عزیز میں صحت مند اور خوشگوار ماحولیاتی ماحول کو یقینی بنایا جا سکے۔
