پاکستان اور ترکمانستان کے درمیان تجارت اور سرمایہ کاری کو فروغ دینے کے لیے اہم ملاقات
اسلام آباد میں ترکمانستان کے سفیر اتاجان مولاموف نے وفاقی وزیر خزانہ و محصولات سینیٹر محمد اورنگزیب سے ملاقات کی، جس میں دونوں ممالک کے درمیان باہمی دلچسپی کے امور خصوصاً تجارتی و اقتصادی تعلقات کو وسعت دینے پر تبادلہ خیال کیا گیا۔
ملاقات کے دوران سینیٹر محمد اورنگزیب نے ترکمانستان کے ساتھ تعلقات کو مزید مضبوط کرنے کے عزم کا اعادہ کیا اور بتایا کہ گذشتہ برس دونوں ملکوں کے درمیان کئی اعلی سطحی وزارتی وفود کے تبادلے ہوئے ہیں۔ ترکمانستان کے سفیر اتاجان مولاموف نے پاکستان کو اہم تجارتی اور سرمایہ کاری شراکت دار قرار دیتے ہوئے کہا کہ پاکستان علاقائی و بین الاقوامی تجارتی سرگرمیوں کا اہم مرکز بھی ہے۔
دونوں رہنماؤں نے توانائی، ٹرانسپورٹ اور تعمیرات جیسے شعبوں میں مشترکہ منصوبوں اور تعاون کے نئے مواقع تلاش کرنے پر بھی اتفاق کیا۔ اس موقع پر ترکمانستان کے وزیر خزانہ و معیشت ماممتگلی استانا گلوف کی جانب سے سینیٹر محمد اورنگزیب کو عشق آباد میں وسط ستمبر میں ہونے والے ترکمانستان انویسٹمنٹ فورم میں شرکت کی دعوت بھی دی گئی، جو ملک کی آزادی کی 34ویں سالگرہ کی تقریبات کے ساتھ منسلک ہے۔
