اسلام آباد میں سینیٹ چیئرمین کی مشیر محترمہ مصباح کھار نے اٹلی کی سفیر مارلینا آرمیلن سے ملاقات کی، جس میں بین الاقوامی پارلیمانی تعاون، روابط اور پاکستان و اٹلی کے درمیان پارلیمانی سطح پر تعلقات کو مضبوط بنانے کے مختلف پہلوؤں پر تبادلہ خیال کیا گیا۔
محترمہ مصباح کھار نے اٹلی کی سفیر کو بین الاقوامی پارلیمانی اسپیکرز کانفرنس (آئی ایس سی) کے قیام سے متعلق آگاہ کیا۔ انہوں نے بتایا کہ یہ فورم بین الاقوامی سطح پر پارلیمانوں کے درمیان تعاون اور مکالمے کو فروغ دینے کے لئے تشکیل دیا گیا ہے اور اب تک دنیا بھر کے 45 ممالک کے پارلیمانی سربراہان اس میں شامل ہوچکے ہیں۔ انہوں نے مزید بتایا کہ حال ہی میں ملیشیا میں منعقدہ انتخابات میں پاکستان کے چیئرمین سینیٹ یوسف رضا گیلانی کو اتفاق رائے سے اس فورم کا پہلا صدر منتخب کیا گیا ہے۔
محترمہ مصباح کھار نے اٹلی کی سینیٹ کی صدر ماریا ایلیزابیتا البرتی کاسلاتی کو نومبر میں اسلام آباد میں ہونے والے آئی ایس سی کے پہلے مکمل اجلاس میں شرکت کی باضابطہ دعوت بھی دی۔ انہوں نے اجلاس کے اہم موضوعات پر روشنی ڈالتے ہوئے کہا کہ ‘امن، استحکام اور سلامتی’ اجلاس کا مرکزی عنوان ہوگا، جس کا مقصد پارلیمانی رہنماؤں کے درمیان بین الاقوامی مسائل پر مکالمہ کو فروغ دینا ہے۔ اس موقع پر کانفرنس کی تیاری کے حوالے سے مختلف سیشنز، اہم موضوعات اور علاقائی وفود کے باہمی تبادلہ خیال پر بھی تفصیل سے گفتگو کی گئی۔
سفیر مارلینا آرمیلن نے اس اقدام کو سراہا اور پاکستان و اٹلی کے درمیان پارلیمانی تعلقات مزید مضبوط بنانے کے لئے باہمی تعاون کے نئے مواقع پر گفتگو کی۔ ملاقات کے اختتام پر دونوں فریقین نے اس امید کا اظہار کیا کہ اٹلی کی جانب سے کانفرنس میں شرکت نہ صرف دوطرفہ پارلیمانی تعلقات کو فروغ دے گی بلکہ عالمی سطح پر پارلیمانی تعاون اور مکالمے کو بھی مضبوط کرے گی۔
