اسلام آباد میں ڈپٹی وزیر اعظم و وزیر خارجہ سینیٹر محمد اسحاق ڈار کی زیر صدارت پاکستان اور ترکی کے درمیان دوطرفہ تعلقات کو فروغ دینے کے لیے قائم کمیٹی کا اجلاس ہوا۔ اس اجلاس میں دونوں ممالک کے درمیان مختلف شعبہ جات میں ہونے والی پیش رفت کا تفصیلی جائزہ لیا گیا۔
اجلاس کے دوران کمیٹی کو معیشت، تجارت، صنعت، تعلیم، صحت، توانائی، دفاع، انفراسٹرکچر اور باہمی رابطوں سمیت کئی اہم شعبوں میں دوطرفہ تعاون کے حوالے سے اب تک حاصل ہونے والی کامیابیوں سے آگاہ کیا گیا۔ اسحاق ڈار نے اس موقع پر اس بات پر زور دیا کہ دونوں ممالک کے درمیان طے پانے والے منصوبوں اور تجاویز پر تیز رفتار عملدرآمد کو یقینی بنایا جائے۔
انہوں نے حکومت پاکستان کی اس پختہ عزم کا اعادہ کیا کہ پاکستان اور ترکی کے درمیان مختلف شعبہ جات میں تعاون کو مزید فروغ دینے کے لیے بھرپور اقدامات جاری رکھے جائیں گے، تاکہ دونوں برادر ممالک کو اس کے ثمرات میسر آسکیں۔ اجلاس میں سیکریٹری خارجہ، معاشی امور، صحت، آبی وسائل، پٹرولیم اور پاور ڈویژن کے سیکریٹریز سمیت متعلقہ محکموں کے اعلیٰ حکام نے شرکت کی۔
