اسلام آباد (ندیم تنولی) وفاقی اردو یونیورسٹی میں 23 کروڑ روپے سے زائد ہاؤس رینٹ بے ضابطگی اور غیر قانونی تعیناتیاں
اسلام آباد — وفاقی اردو یونیورسٹی آف آرٹس، سائنس اینڈ ٹیکنالوجی کو پبلک اکاؤنٹس کمیٹی نے 23 کروڑ روپے سے زائد ہاؤس رینٹ سیلنگز کی بے ضابطہ و غیر مجاز ادائیگی اور غیرقانونی بھرتیوں کے معاملے پر کڑی جانچ پڑتال کا سامنا ہے۔ آڈٹ رپورٹوں کے مطابق سنہ 2001 سے 2013 کے دوران ملازمین کو گھروں کے مالکان کی بجائے براہ راست رقوم ادا کی گئیں، رہائشی جائیدادوں کا ٹھیک سے جائزہ نہیں لیا گیا اور سرکاری کرایہ حدود کو بھی نظرانداز کیا گیا۔ یونیورسٹی انتظامیہ نے دعویٰ کیا ہے کہ اب یہ عمل بند ہو چکا ہے، تاہم کمیٹی نے تمام متعلقہ کرایے کے جائزے کے ریکارڈز طلب کرتے ہوئے کیس کی تصدیق کے بعد ہی معاملے کے نمٹانے کی ہدایت کی ہے۔
اسی دوران کمیٹی نے دو سینئر اساتذہ، ڈاکٹر عبدالرزاق میمن اور ڈاکٹر محمد نعیم اللہ کی تقرریوں کی بھی چھان بین شروع کی ہے، جنہیں عوامی اشتہار کے بغیر تعینات کیا گیا۔ آڈٹ میں کہا گیا ہے کہ ڈاکٹر میمن کی تین لاکھ روپے ماہانہ تنخواہ فنانس ڈویژن کی لازمی مشاورت کے بغیر مقرر ہوئی۔ کمیٹی نے یونیورسٹی کو ہدایت دی ہے کہ دونوں اساتذہ کی اہلیت کے معیار، سروس مدت اور شائع شدہ تحقیقی کام کا ریکارڈ فراہم کیا جائے اور ان تقرریوں کی منظوری سینیٹ سے لی جائے جیسا کہ 2017 میں ہدایت کی گئی تھی۔
یونیورسٹی کے خلاف مزید مالی بے ضابطگیوں میں شام کی شفٹ کے الاؤنسز مد میں 92 لاکھ روپے سے زائد کی غیرقانونی ادائیگی اور یونیورسٹی کی جگہ واپڈا سے کم ریٹ پر کرایہ پر دینے سے 21 لاکھ روپے سے زائد کے نقصان کا انکشاف ہوا ہے۔ پبلک اکاؤنٹس کمیٹی نے ہدایت کی ہے کہ جہاں لازم ہو، وصولیاں یقینی بنائی جائیں اور آئندہ مالی و تقرری قوانین کی سختی سے پابندی کی جائے تاکہ مستقبل میں اس قسم کی خلاف ورزیاں روکی جا سکیں۔
