پاکستانی سفیر ڈاکٹر محمد خالد اعجاز نے لزبن میں بنگلہ دیش ہاؤس کا دورہ کیا جہاں انہوں نے جولائی-اگست انقلاب کی پہلی سالگرہ کے موقع پر بنگلہ دیشی قوم کے ساتھ یکجہتی کا اظہار کیا۔ اس موقع پر انہوں نے پرتگال میں مقیم بنگلہ دیشی برادری کی مثبت خدمات کو سراہا اور پاکستان کی جانب سے نیک تمناؤں اور بھائی چارے کے جذبات کا پیغام پہنچایا۔
ڈاکٹر محمد خالد اعجاز نے اپنے خطاب میں کہا کہ بنگلہ دیشی کمیونٹی نہ صرف پرتگال بلکہ عالمی سطح پر بھی اہم کردار ادا کر رہی ہے۔ انہوں نے اس بات پر زور دیا کہ دونوں ممالک کی کمیونٹیز کے درمیان بھائی چارے اور تعاون کو مزید فروغ دیا جائے گا۔ پاکستان اور بنگلہ دیش کے عوام کے درمیان دیرینہ تعلقات کو اجاگر کرتے ہوئے، پاکستانی سفیر نے آئندہ بھی اس سلسلے کو مضبوط بنانے کے عزم کا اظہار کیا۔
