وفاقی وزیر صحت سید مصطفی کمال نے شینڈن گروپ کے چیئرمین سے ملاقات میں پاکستان میں طبی آلات اور ادویات کی مقامی تیاری بڑھانے کے امکانات پر تبادلہ خیال کیا۔ اس اہم ملاقات میں وفاقی سیکرٹری صحت سید وقار الحسن بھی موجود تھے۔
ملاقات کے دوران دونوں فریقین نے ملک میں طبی ٹیکنالوجی کی مقامی مینوفیکچرنگ کی صلاحیت کو فروغ دینے پر گفتگو کی۔ اس بات چیت کا مرکز طبی آلات اور ادویات کی مقامی تیاری، جدید ٹیکنالوجی کی منتقلی اور اس شعبے میں براہ راست غیر ملکی سرمایہ کاری کے مواقع شامل تھے۔
وزیر صحت مصطفی کمال نے اس موقع پر واضح کیا کہ حکومت پاکستان طبی آلات اور ادویات کے شعبے میں سرمایہ کاری کی بھرپور حوصلہ افزائی کررہی ہے۔ انہوں نے سرمایہ کار کمپنیوں کو ہر ممکن سہولت اور تعاون فراہم کرنے کی یقین دہانی بھی کروائی۔
ان کا کہنا تھا کہ وزارت قومی صحت خدمات ملک میں معیاری طبی آلات اور ادویات کی دستیابی کو یقینی بنانے کے لیے سرگرم عمل ہے۔ حکومت کی کوشش ہے کہ مقامی پیداوار اور جدت کے ذریعے بیرونی ممالک پر انحصار کم کیا جائے اور صارفین کو صحت کی سہولیات زیادہ قابل رسائی اور کم قیمت پر مہیا کی جائیں۔
